Деяния Собора 1666-1667 г. Сказание о святом соборе

Деяния Собора 1666-1667 г. Сказание о святом соборе


К оглавлению

К разделу


(Текст приводится по: «Дополненiя къ актамъ историческимъ собранныя и изданныя археографическою коммиссiею. Т.V спб. тип. Эдуарда Праца. 1855г. Стр. 439-442»)

I. Сказаніе о святомъ соборѣ.

Повелѣніемъ благочестивѣйшаго, тишайшаго, самодержавнѣйшаго, великого государя царя и великого князя Алексѣя Михайловича, всеа Великія и Малыя и Бѣлыя Росіи самодержца, въ царствующемъ преименитомъ и богоспасаемомъ градѣ Москвѣ, на новоявльшіяся расколники и мятежники святыя православнокаѳолическія церкве соковокупленномъ, въ лѣто 7174.

Царя во Пророцѣхъ, Пророка же въ царѣхъ, богоумудренное рожденіе всеа негли твари естествъ преискусный изслѣдитель Соломонъ на тріехъ вещехъ притупи остроту ума своего, четвертія же весма не постоите, якоже самъ повѣствуетъ: тріе мнѣ суть невозможни разумѣти и четвертаго же не свѣде, таже суть: слѣда орла паряща по воздуху, и пути змія ползуща по камени, и стези корабля пловуща поморю, а четвертое есть и пути мужа въ юности его, или яко въ Еврейскомь чтется языцѣ : пути мужа въ юношѣ; еже сказателми толкуемо есть о пути Христа Господа въ преблагословеннѣй Дѣвѣ Маріи, иже мужъ бяше совершенный разумомъ и въ самомъ несѣкомомъ времене зачатія си во утробѣ матерней, якоже и о прочіихъ путехъ благослови я, искуствомъ обогащеніи сказателіе сицевое творятъ толкованіе: слѣдъ орла паряща по воздуху есть путь Христа Господа, аки орла борзыма крылома воздуха страны превозшедша и въ небесныя высоты силою божества своего вознесшася, въ день преславнаго его вознесенія; путь змія ползуща по камени есть того жъ Христа Господа зміемъ мѣдянымъ отъ Моисея прообразованнаго путь изъ камене гробнаго, или изъ гроба каменного, весма непостижимый, ибо изыде не разрѣшивъ печати; путь корабля пловуща по морю есть путь церкве на мори міра ceгo пловущія, чрезъ посредіе волнъ гоненія, скорбей, бѣдъ, напастей, искушеній, яже отъ юныя версты своея еще отъ пеленъ дѣтскихъ много пострада отъ противоратника діявола, внегда едва еще Христу рождьшуся многимъ быти тысящамъ младенецъ ссущихъ отъ Ирода, Фараонимъ духомъ на Еврейскія дѣти исполненнаго, убіеннымъ. Еже описуя высокопарящій онъ орелъ Іоанъ святый во Апокалипсіи глаголетъ: и знаменіе веліе явися на небеси, жена облеченна въ солнце, и луна подъ ногами ея, и на главѣ ея вѣнецъ отъ звѣздъ двоюнадесять, и во чревѣ имущи вопіетъ болящи и страждущи родити; и явися ино знаменіе на небеси, и се змій великъ черменъ, иже стояше предъ женою хотящею родити, да егда родитъ снѣсть чадо ея; и роди сына мужска, иже имать упасти вся языки жезломъ желѣзнымъ, и восхищенно бысть чадо ея къ Богу и престолу его. Кто же сія есть жена толикими свѣтилы украшенная, точію церковь, свѣтомъ истинныя вѣры и различныхъ добродѣтелей сіяніемъ улѣпотствованная, Христа Господа духовнѣ въ духовныхъ удесѣхъ его выну раждающая, иже егда плотьски отъ пресвятыя и пренепорочныя Дѣвы Матере безъ нетлѣнія и кромѣ болѣзни родися, восхищенъ бысть (не абіе отъ рожденія, но въ день вознесенія своего) къ Богу и престолу его, и многую корысть зміеви отъемъ проклятому совнесе съ собою.

Чесо ради разгнѣвася змій на жену, церковь, не могій терпѣти, якоже и Авимелехъ древле, яко побѣдися женою, испусти за женою изъ устъ своихъ воду гоненія яко рѣку, да ю въ рѣцѣ кровавой потопитъ, и поможе земля женѣ, и отверзе земля уста своя и пожре рѣку; помогоша земстіи царіе благочестивіи церкви, егда отверзше уста своя возбраниша водамъ гоненія наводнятися и кровавой рѣцѣ, мучительми точимѣй, повелѣша утолѣннѣй быти; онъ же иде сотворити брань со оставльшимъ сѣменемъ ея, и отъ того часа не престаетъ ветхій змій на церковь православную ратовати проклятыми еретики и гонительми, яко пріискрыними вои своими. Ихъ же первое богомерзское полчище бысть богоубійцы, князи Іудейстіи, книжницы и Фарисеи, иже божественныя ученики Господня озлобившіи и умертвившіи различными мученіи роды. Второе пособствоваша треклятому зміеви, еже на церковь ратовати, нечестивіи царіе земстіи, безчеловѣчный мучитель Неронъ, злолютый томитель Декій, нестерпимый гонитель Максиміанъ, звѣронравный Сѣвиръ и кровонесытный убиватель Діоклитіанъ, и имъ подобніи злобоподражателіе богоненавистныи, иже аки во морстѣй пучинѣ корабль церкве Христовы тщахуся въ крови святыхъ мученикъ утопити. Но благодатію Божіею, яко корабль Ноевъ, елико воды умножахуся, толико выше возношашеся, тако и корабль церкве, елико воды и волны гоненія прибываху, толико ихъ превозхождаше , и тако въ потопленія мѣсто сицевымъ наводненіемъ путь пространный во всю вселенную сотвориша церкви, и о ней же торжественики себе быти непщеваша, сами побѣждено и оторжествовани быша. Сице убо змій ветхій ничесоже успѣвъ на церкви, новая на ню изведе полчища еретиковъ богоотступныхъ, иже богомерзкими хуленьми своими, аки острыми стрѣлами, въ корабли церкве плавающія тщахуся сострѣляти люди; ихъ же стрѣлъ множество на церковь испущенныхъ прилежно нѣціи потщавшеся собрати, велія тулы книжныя наполниша ими: святый бо Епиѳаній, епископъ Кипрскій, въ шестерицу книгъ своихъ едва помѣстилъ есть осмь десятицъ стрѣлъ различныхъ еретичествъ; подобнѣ Келсій нѣкто различныя различныхъ любомудрецъ міра ceгo собирая ложнонепщеванія, шесть книгъ написа глаголемыхъ, ими же всѣми великія церковь пострадавши язвы едва небеснаго Врача промысломъ получи исцѣленіе. Но между всѣми лютѣйшее бяше уязвленіе стрѣлы богохулника Аріа, ядомъ бо ея едва не все тѣло церкве поврежденію бяше, даже возстена весь міръ и аріанствовати себе удивися, Іеронимъ святый глаголетъ: о коль велія тогда нужда бяше врачевства же и врача искусна на изцѣленіе язвы, но не меншая бѣ потреба вожда и воинства на пораженіе противно ратовавшихъ, яже вся даде Христосъ Господь, удобно обѣщаніе сотворивый церкви: се азъ съ вами есмь по вся дни до скончанія вѣка, аминь. Ибо дарова въ то время премудрыя врачи церкви, Василія Великого, Аѳонасія, Григорія Богослова, Амвросія, Августина и иныя, иже премудрыми своими писанми, яко здравотворными врачевствы, исцѣлиша тую язву и ядъ душепагубный искорениша; даде и прехрабра вожда съ воинствомъ, ибо возбуди еже ревновати по церкви благочестивѣйшаго, тишайшаго, православнаго царя Константина, иже уподобився Аврааму патріарху собравшу древле триста и осмьнадесять домочадецъ си и побѣдившу сопостаты, собра на соборъ иже въ Никеи первый триста и осмьнадесять Отецъ святыхъ, имиже посѣче и побѣди Аріанское богомерзское полчище со ученіемъ его лестнымъ; его ревности подражая благочестивый царь Ѳеодосій, добрѣ брася о церкви и о чести Бога Духа святаго, собра бо въ Константинъ градъ сто и пятьдесятъ Отецъ святыхъ па духоборца Македонія, и раздруши его безумнаго соборища нечестивое лщеніе; по немъ благій наслѣдникъ тако имене и царствія, якоже добродѣтелей и ревности яже но Бозѣ, тожде сотвори, во Асійскомъ Ефесѣ собравъ святыхъ Отецъ двѣстѣ на Несторія патріарха Царяградцкаго, егоже посѣкоша мечемъ духовнымъ слова Божія Отцы святіи, купно со душепагубнымъ его мудрствованіемъ, паче же рещи достоитъ, буйствованіемъ. Еще же ни тако душехищному зміеви престававшу на церковь рать подвизати, вооружившу же скорпіекожными бронми и жаломъ смертоноснымъ два исполины геенскія, Діоскора патріарха Александрійскаго и Евтихія архимандрита Константинопольскаго, ста сопротивъ благочестивый царь Маркіянъ, иже собравъ во градъ Халкидонъ святыхъ Отецъ шестьсотъ и тридесятъ, и преславно побѣди та два исполина со всѣми ею единомысленники; ибо попраша ихъ безбожное хулительство Отцы святіи и яко куколь вредный исторгше отъ чистыя пшеницы, во огнь проклятія на сожженіе вовергоша.

Но не у кончина борбы, ибо змій онъ седмоглавый и до седми кратъ борцы свои посылати дерзаетъ: въ пятое убо тщахуся храбрствовати на позорищи міра ceгo съ церковными ратники седмочисленніи ересеначалницы, аки седмь главъ зміевыхъ: Оригенъ, Евагрій, Дидимъ, Ѳеодоръ Мапсуенскій, Анфимъ, Петръ изъ Ора, со своими единомысленники; но тщаніемъ благочестиваго царя Іустиніана, собранными въ Константинъ градъ сто и шестіюдесять Отцы святыми, весма суть побѣждени и нечестивое ихъ ученіе попрано. И тако ветхій змій въ проклятыхъ своихъ изнеможе начинаніихъ, обаче не измѣни лукаваго помышленія своего, ибо еще яко десяторогъ сый воздвиже роги своя на церковь, десять оныя еретики проклятыя: Ѳеодора иже въ Фараи епископа, Онорія Римскаго, Кира Александрискаго, Сергія, Пирра, Петра и Павла Константинопольскихъ, Макарія Антіохискаго и Стефана ученика его и Полихронія безумнаго старца; на нихъже вооружися теплый поборникъ православныя церкви благовѣрный царь Константинъ Погонатъ реченный, собра полкъ святыхъ Отецъ сто семдесятъ и единаго въ Царьградъ третее, въ Полату Труллъ нареченную, ихъже богоумудренными разумы и преподобными словесы тіи зміеви рози сотрошася и ихъ острота душеубійственная весма притупися. Напослѣдокъ не могій уже змій проклятый тѣлу церкве въ членахъ, или въ составѣхъ вѣры благочестивыя, вреда смертоноснаго сотворити , нача яко песъ гнѣвливый, керверъ проклятый, одѣянія тѣла церкве украшеніе ея боголѣпное терзати, еже есть иконы святыя изметати и сокрушати, хулити и губити; но одѣявый Богъ нагаго Адама и пресвѣтлыми небо украсивый астры, землю же прекрасными улѣпотствовавый цвѣты, не попусти ему еже возлюбленную свою невѣсту лѣпоты ея обнажити, сотвори ревностію ревновати по святыхъ иконѣхъ благочестиваго царя Константина и матерь его Ирину, яже собраста въ Никейскомъ градѣ второе Отецъ святыхъ триста шестьдесятъ седмь, иже жезлы своими пастырскими сокрушиша зубы пса геенскаго, поразиша главы кервера преисподнѣйшаго, украсиша же невѣсту Христову церковь пресвѣтлою лѣпотою ея, святыми и божественными иконы, имиже выну свѣтлѣе неже небо звѣздами сіяетъ.

Оттолѣ убо змій седмоглавый, Седмію святыми вселенскими соборы весма побѣжденный, стенетъ и горцѣ рыдаетъ, яко не можетъ церкви Божіей одолѣти, обаче (*) ратники своя посылати дерзаетъ; ибо Лютры, Калвины и имъ подобныя отступники сатанинскими си вооруживъ бронями, ратовати поучаетъ, выетъ керверъ преисподни, яко зубы своими ненасытными неточно снѣсти церкве, но ниже уязвити можетъ, обаче лаянія престати не хощетъ. Се бо, въ наша послѣдняя времена, внутрь ограды стада Христова обрѣтъ себѣ сосуды угодныя, сыны погибельныя, научи я яко псы лаяти на пресвѣтлую невѣсту, въ солнце правды облеченную, на церковь Христову; иже ничесоже въ ней мрачнаго видяще, точію мнящеся видѣти, яко пси всуе лаютъ, да угодни будутъ господину своему змію, емуже подчинишася. Лаютъ же и клевещутъ не словесы точію лживыми, но и писанми много хуленіемъ исполненными, толико гласно и дерзостно, якоже симъ даже рукамъ, онымъ же ушесамъ, коснутися самого пресвѣтлаго Богомъ вѣнчаннаго, православнаго, великаго государя царя и великаго князя Алексѣя Михайловича, всеа Великія и Малыя и Бѣлыя Росіи самодержца, иже отнелѣже хулы услыша и прочте богомерзкія свитки, абіе ревностію возревнова, якоже и иже рекій: ревность дому твоего снѣде мя, и возопи велегласно, якоже иногда Иліа пророкъ: ревнуя поревновахъ по Господѣ Вседержителѣ, яко оставиша тя сынове Израилевы, олтари твоя обругаша и священники твоя уничижиша, святая твоя похулиша, книги облаяша; и тако огнемъ ревности святыя раждеженъ сый, излія отъ очію си источники водныя, умы лице свое струями слезными и сотвори якоже благовѣрный царь Константинъ и прочіи вышепомяненніи благочестивіи царіе: повелѣ собору быти всѣхъ архіереовъ своея благочестивыя державы, въ царствующемъ преименитомъ и богоспасаемомъ градѣ Москвѣ, заповѣда абіе царьскими си посланьми во странахъ и градѣхъ Великоросійскаго православнаго си обладанія архіереомъ жительствующимъ увѣщеннымъ о соборѣ быти и времени его назнаменоватися.

Бысть же слово дѣломъ, и дѣло словомъ: ибо дошедшимъ въ руцѣ преосвященныхъ архіереовъ православнаго скипетродержца посланіямъ, всякого извѣта и умедленія кромѣ, яко добрыи вои Христовы, потщахуся на борбу съ противники церкве Христовы и яко добріи пастыріе текоша воеже хищныя волки поразити. Пріидоша же на время уреченное во пресловутый царствующій христоименитый градъ Москву, на день мѣсяца Февруаріа.