Поместный Московский Собор 1666-1667 г. Вопросы, разрешенные патриархами Паисием и Макарием.
(Текст приводится по: «Дополненiя къ актамъ историческимъ собранныя и изданныя археографическою коммиссiею. Т.Ѵ спб. тип. Эдуарда Праца. 1855г. Стр. 507-510»)
XII. Вопросы, яже разрѣшили всесвятѣйшіи два патріархи, кѵръ Паисій, Папа и Патріархъ великого града Александріи и судія вселеннѣй, и кѵръ Макарій, Патріархъ великаго божія града Антіохіи и всего Востока.
Вопросъ. Никонъ монахъ егда бѣ на патріаршескомъ престолѣ, пришедъ онъ къ великому государю царю и великому князю Алексію Михайловичю, всеа Великія и Малыя и Бѣлыя Росіи самодержцу, и рече предъ великимъ государемъ и предъ всѣмѣ сѵгклитомъ, заповѣдая вслухъ всѣмъ и научая сице: отнюдъ да не отпустится отнынѣ впредь священникомъ нетокмо причащати разбойниковъ и татей Пречистыхъ Таинъ, но ниже исповѣдывати ихъ и въ послѣдній часъ казни ихъ, прилагая cie, яко кто мимо сей заповѣди что сотворитъ, и той проявляющійся будетъ отвѣтъ давати Богу въ день Страшнаго суда.
Сія Никонъ и послѣдующій ему повелѣваху явственѣ не писаное же и писано. И сего ради умножися разбойниковъ и татей, и сѣдятъ въ темницахъ многое время.
Патріаршескій отвѣтъ и сочиненіе: Къ симъ же и мы глаголемъ, яко сія вся суть еретическая, и пребеззаконна, и внѣ церкви Христовы, елико убо во исповѣди является Никонъ и послѣдующіи ему Наватіане и Евстафiане, иже не пріимаху кающихся отнюдъ, мудрствующе и глаголюще противно богопроповѣдникомъ Апостоломъ и богоноснымъ Отцемъ. Глаголетъ убо 52 правило Святыхъ Апостолъ: аще кто епископъ, или пресвитеръ, не пріиметъ человѣка иже возвращается отъ грѣхъ своихъ къ покаянію, но ненавидитъ и отмещетъ его, якоже скверный онъ Наватъ, да извержется; зане печали Христа, иже рече: радость бываетъ на небеси о единомъ грѣшницѣ кающемся. Сего ради и Господь нашъ Іисусъ Христосъ грѣшниковъ ради спасенія преклони небеса и сниде на землю, и воплотися отъ пречистыя крове Пресвятыя Дѣвы, сице рече явственнѣйше: не пріидохъ призвати праведныя, но грѣшныя на покаяніе; сего ради человѣколюбію его ни единъ грѣхъ нашъ одолѣетъ. Якоже и чрезъ Пророка возгласи: глаголи ты прежде грѣхи твоя, яко да оправдишися. И паки рекъ: да исповѣмъ на мя беззаконія моя Господи, и ты оставилъ еси нечестіе сердца моего. И паки: да не упомню вся его согрѣшенія. Но иже въ Лаодикіи соборъ правило 2 глаголетъ: елицы въ разные времена сотвориша разныя грѣхи, чрезъ покаяніе и исповѣданіе, ради щедротъ Божіихъ, и благости пречистыхъ Таинъ да сподобятся. Чти и правило 46 Карѳагенскаго собора, еще же и 55 правило Великаго Василія. Яко разбойниковъ и татей подобаетъ причащати страшныхъ и пречистыхъ Таинъ Христовыхъ въ послѣдній день казни ихъ, аще вседушно покаются и исповѣдаются, видится явно въ 13 правилѣ Перваго вселенского собора иже въ Никеи. Толкуемъ же мы два патріархи cie правило 318 богоносныхъ Отецъ иже въ Никеи: яко подобаетъ причастити хотящихъ умрети благочестивыя и отходящыя отъ житія сего, ради всякого извѣта и вины, якоже и въ 7 правилѣ Карѳагенского собора сущихъ въ бѣдахъ примирити священныхъ Таинъ повелѣваетъ. Толкуемъ и мы сіе правило и глаголемъ, якоже толкова и Алексій іеродіаконъ въ Кормчемъ правилѣ, глаголя: яко бѣда нѣсть, ино точію смертная казнь; тако и мы разумѣемъ, что то есть нужная и безвременная бѣда смертная казнь, въ которой и страшной бѣдѣ хотятъ святіи Отцы и мы послѣдующіи имъ, яко да причастятся пречистыхъ Таинъ по исповѣди повинніи смертной казни: зане Избавитель нашъ даде честную свою кровь и излія ради всѣхъ грѣшниковъ. Cie изреченіе прія и Агкирскій соборъ, правило 76: слышите же вси cie и знаменуйте иже въ чаяніи смерти, яко является нужная смерть, якоже изъявляютъ и прочіи случаи, отъ недугъ, или инако случится нѣкая казнь смертная, главосѣченіе, или повѣшеніе, или иное смертное осужденіе. Таяжде и 5 правило Григорія Нисскаго глаголетъ: аще кто не соверша епитеміи лѣтъ, иже заповѣда ему отецъ духовный, яко да не причастится, аще же въ немощъ впадетъ и пріидетъ къ смерти, человѣколюбнѣ святіи Отцы повелѣваютъ да причастится, яко да не исходитъ безъ исповѣди и безъ причастія въ долгое оно и послѣднее отхожденіе. Къ симъ собирается святыхъ Отецъ человѣколюбное разсмотрѣніе, да никто отъ благочестивыхъ умретъ непричастенъ Пречистыхъ Таинъ тѣлу и крове Господа Бога и Спаса нашего Іисуса Христа. Толкуетъ убо изрядно и Матѳей Властарь, въ стихіи 40, глава 11.
Вопросъ. Когда и коликихъ дней имѣти будетъ осужденный разбойникъ, или тать; прежде послѣдняго осужденія казни, да уготовится къ достойному покаянію и еже причаститися Пречистыхъ Таинъ.
Отвѣтъ. Патріаршеское наше разсужденіе и изображеніе изъявляетъ, [имѣюще и выше всякой архіерейской власти растяяще и умаляющіи епитеміи, съ благословною виною, согрѣшающихъ человѣковъ]. Хощемъ убо мы и повелѣваемъ, яко отънынѣ осужденныхъ разбойниковъ и татей да исповѣдываютъ и да причащаютъ ихъ Божественныхъ и Пречистыхъ Таинъ, которые будутъ исповѣдатися и покаятися и плакатися доволно съ сокрушеніемъ сердецъ и душъ ихъ: прежде казни единъ или два дни, повелѣваемъ, да идетъ священникъ ко осужденному и повинну сущу смерти, да исповѣдаетъ его прилежно со всякимъ испытаніемъ, потомъ да причаститъ Пречистыхъ Таинъ. Но еще хощемъ и весь день оный да пребудутъ съ ними единъ или два отъ искусныхъ, яко да научатъ ихъ и да возвѣстятъ имъ оныя страшныя и безконечныя муки и судилища, и яко да имутъ упованіе и надежду на крайнее Божіе человѣколюбіе и безмѣрную милость, и аще сего свѣта привременнаго житія лишаются ради беззаконія своего, да не лишени будутъ отъ вѣчнаго житія, якоже и благоразумный разбойникъ иже при Христѣ распеншійся; да воспоминаютъ имъ и о Блудномъ сыну и о иныхъ многочисленныхъ грѣшницѣхъ, о нихъже является, яко преодолѣ благоутробіе Бога нашего и крайнее человѣколюбіе его. Въ сей статьѣ, по вышеписанному вопросу, обрѣтаемъ
Вопросъ. Мнози обрѣтаются на разбояхъ и въ татьбахъ, но и въ денежныхъ дѣлѣхъ отъ священническаго и монашескаго чина, како имутъ тіи наказатися по закономъ?
Отвѣтъ. Два судилища обрѣтаются во вселеннѣй, едино церковное [еже внутреннее именуется], иже судятъ о душахъ, другое мирское [еже и внѣшнее глаголется], и cie на-зираетъ токмо тѣлесное; и двѣ смерти привременная и вѣчная являются быти въ мірѣ. И сего ради не имать судіа душевно и тѣлесно наказати, зане не дадеся яко единъ той да имать двѣ власти вкупѣ, мірское и церковное; но подобаетъ кіиждо да хранитъ чинъ свой и судъ судилища своего. Обаче священникъ, или діаконъ, или монахъ, или иніи отъ освященнаго чина, иже врѣваются въ неподобныя дѣла и противно царствію имутъ, да накажутся первѣе церковно по священнымъ правиломъ отъ помѣстнаго архіереа, и потомъ аще той же согрѣшитъ и второе, да накажется и градскимъ судомъ. И аще кто отъ освященнаго чина врѣвается въ мірская попеченія, по шестому правилу Святыхъ Апостолъ, аще не престанетъ, да извержется. Колми паче имутъ извержени быти, которые бываютъ въ разбояхъ, въ татбахъ и денежного дѣла въ воровствахъ; подобаетъ убо да наказуются и градскимъ судомъ таковіи, аще паки впадутъ въ таковое прегрѣшеніе, или во ино вышеписанное. Пишетъ бо Матѳей Властарь, глава 15: Аще кто, кромѣ повелѣнія царского, дѣлаетъ деньги или золотые или пѣнязи, хотя отъ сребра и злата чиста или не чиста, да отсѣкутся обѣ руцѣ его; и аще кто вѣдаетъ о томъ, что дѣлаетъ такіе денги, а вѣдомо не учинитъ, да отсѣчется едина рука. И кійждо имать наказатися по разсужденію вины его: зане аще будетъ убійца, или началникъ разбойниковъ, или татбы сотворилъ многи, да отсѣкутся обѣ руцѣ его, или да извергутся обѣ зѣницы его, яко да узрятъ прочіи и да престанутъ зло творити. Сего ради, да разсудятся съ раздѣленіемъ различнымъ тати, якоже глаголетъ той же Властарь, глава 16, о татехъ: Елицы единожды крали, аще будетъ свободой, а не раби, подобаетъ убо сугубо возвратити противо вещи крадомыя; аще же будутъ убози и нищи татіе, да предадутъ ихъ зѣльному біенію и заточенію; аще же не единожды твориша краденіе, но многажды, да отсѣкутся руцѣ ихъ. Такожде и пріемлющіи крадомое священницы и діакони, или отъ священнаго чина клирики, да наказаются перьвѣе церковнѣ по священнымъ правиломъ, якоже и татіе, и аще убо покаются, добро; аще же и второе поимаются по градскимъ закономъ да накажутся. Подобно и винопродавцовъ имутъ наказатися тяжко: аще будетъ отъ священнаго чина, по священнымъ правиломъ да накажутся, аще же не престанутъ, да извергутся. Подобно же симъ священницы и всякаго священнаго чина которые въ вѣдовствахъ поиманы будутъ, первѣе да накажутся церковнѣ изверженіемъ, и еще не престанутъ, да накажутся и градскимъ закономъ. А о поповыхъ дѣтехъ глаголемъ: аще убо не имутъ осѣненія архіерейска и священнословія на себѣ, яко мірьстіи да накажутся въ мірскихъ судилищахъ по винамъ сотвореннымъ отъ нихъ; аще же суть хиротонисани, имутъ наказати … первѣе церковнѣ, якоже и клирики, отлученіемъ или изверженіемъ, по разсмотрѣнію винѣ ихъ.
Вопросъ. Мнози обрѣтаются нынѣ въ темницахъ заключени многіе лѣта нетокмо разбойницы, но и церковные татіе, которіи крали многія церкви, и церковныя вещи и мірское имѣніе, которое поставлено на сохраненіе.
Отвѣтъ. Къ симъ отвѣщаемъ по 10 правилу Перваго и Втораго соборовъ, иже глаголетъ: аще кто возметъ отъ святаго олтаря сосудъ нѣкій освященъ святому олтарю, или иныя вещи, въ потребу неосвящену употребити, или отдастъ инымъ въ простую потребу, Апостольскіе правила 72 и 73 отлучаютъ ихъ. И мы таковыхъ соотлучаемъ же, и зѣло праведно, зане аще кто отъ церкви возметъ свѣщи, или елей и ино мало нѣчто, отлучается, аще ли будетъ и самъ служай церкви; кольми паче святотатцы, аще мірстіи суть, или отъ священнаго чина, имутъ наказатися таковіи тяжкою казнію. Глаголетъ же и Григорій Нисскій во осмомъ своемъ правилѣ: яко святотатба въ Ветхомъ писаніи бѣ осуждена якоже и убійство, зане таковыхъ убійцовъ и святотатцовъ равно каменіемъ побиваху; якоже и Ахаръ укаменовася со всѣмъ родомъ своимъ, аще и господьствено краденое не бѣ имъ освящено Богу. Къ симъ же повелѣваетъ Градскій законъ о святотатцѣхъ: кто пойдетъ нощію во святилище, и приступитъ ко святому престолу, и крадетъ отъ священныя вещи, да отсѣчется глава его; аще же кто въ день отъ церкви крадетъ нѣчто, ради убожества своего, да біютъ его первѣе до ста ударовъ, по разсужденію крадомыхъ вещей; аще же есть много крадомое, да будетъ заточенъ. Такожде повелѣваютъ Закони градстіи: кто украдетъ нѣчто еже не Богу освящено, но поставленое въ церкви сохраненія ради, не святотатецъ таковый именуется, но токмо тать.
Вопросъ. О лавкахъ, и о торгахъ, и о всякихъ промыслахъ, которыми промышляютъ священнаго чина, и чернцы и черницы, да и дворы за собою держатъ многія и пущаютъ изъ наймовъ нетокмо Руской породы людей, но и странныхъ иновѣрцовъ; и оттого чинятся многая безчинія и всякое нестроеніе.
Отвѣтъ. О клирикахъ убо явственно изъявляетъ 9 правило иже въ Труллѣ святаго собора, не повелѣваетъ клирику имѣти лавки корчемныя, и поистиннѣ, и 54 Канонъ святыхъ Апостолъ не попущаетъ клирика внити въ корчемницу ясти; колми паче да не имѣютъ монаси корчемницы, и лавки, и дворы держати и въ наемъ давати, и врѣватися въ неподобныя дѣла.
Аще убо кто отъ священнаго чина врѣвается въ тѣ же вышеписанныя вещи, въ мірская попеченія, или да престанетъ, или да извержется; а монахъ занеже отъ того времене, егда обѣтъ сотвори и прія монашескій образъ, бываетъ безъ стяжанія и отъ всего чюждъ, отнелѣже пострижется не можетъ вящше имѣти лавокъ, ниже дворовъ попущати въ наемъ, токмо подобаетъ вся отдати монастырю, идѣже обѣщаніе сотвори; или аще хощетъ да продастъ, зане по монашескому обѣту не подобаетъ вящше врѣватися въ мірская попеченія, Богу работати и мамонѣ никтоже можетъ.
Елицы же монаси преступятъ чинъ и обычай монашескаго обѣта, патріаршеская власть и царьская держава имать таковая монашеская стяжанія взяти и раздати нищимъ, по изображенію 5 правила Перваго и Втораго собора.
Черновой подлинникъ писанъ на осъми листахъ.
Предъ выписанными здѣсь соборными постановленіями и актами, входящими въ составъ не переплетеннаго Сборника, хранящагося въ Синодальной библіотекѣ подъ № 1, находится заглавный листъ, на которомъ сдѣланы слѣдующія надписи: вверху № 229; нѣсколько ниже скорописнымъ почеркомъ XVII вѣка: Тетрати разныя соборныя изложенія святѣйшихъ патріарховъ; еще ниже новѣйшимъ почеркомъ: Дѣянія Московскаго собора Греческихъ и Россійскихъ владыкъ, о разныхъ до церкви относящихся предметахъ, въ 1667 году.