Деяния Поместного Собора 1660г.
Позстановление московскаго собора о низложении патриарха Никона с патриаршаго престола
(Печатается по изд.: Гиббенет Н. А. Историческое исследование дела патриарха Никона. СПб., 1882. Т. 1. С. 214 и далее (примечания к тексту также взяты из этого издания). Замечания о рукописи: Правлено рукою царя. Столбцы по склейкам скреплены: Диак Артемей Степанов)
Всесилнаго и всемогущаго Бога властию, и премудростию, и промышлением вся премудростне состоится, и сострояются небесная, вкупе и земная, и всяк дар свыше от него вседержителя дается, и всякое дело благое устрояется, без него же ничто же бысть еже бысть. Той же и ныне озарив светом богоразумия вернаго своего слугу, избраннаго от него и почтеннаго, и им превознесеннаго, и елеом святым помазаннаго, благочестиваго и христолюбиваго, государя нашего царя и великаго князя Алексия Михайловича, всея великия и малыя и белыя России самодержца, и в прочих концех земли осиявшаго, и славимаго благочестием и верою, истиннаго хранителя християнскаго закона и блюстителя заповедей его, и крепкаго рачителя божественных долгмат, и ревнителя древним святым великим царем, во благочестии просиявшим, великому царю Константину и матери его блаженней царице Елене, и прочим благочестивым царем, сотворившим святыя богодухновенныя соборы. И вложи во ум его благую мысль собрати святый собор, да богословие и правилне настоящая вина решится еже в прешедшее 166-е лето безпастырна сотворися святая соборная и апостольская великороссийская церковь, святейший бо патриарх великий господин Никон остави престол свой, даже и доднесь святая соборная и апостольская церковь пастыря и жениха не имеет. Но благий наш Бог не презре безпастырны нас быти. Его же великому сему всего мира хранителя кораблю такова мудраго нашего кормчиа благочестивийшаго великаго государя царя заступника воистинну востави, устрояюща словеса на суде храняща истинну ввеки, творяща суд и правду посреде земли и непорочным путем ходяща, его же мудрость порождьши и соблюдши, и добре добродетелми воспитавше же и украсивши, и божественнаго исполнивши духа. Око вселенней яви ума чистотою и светлостию просвещающа, светле подвластныя: ему же свою церковь преда, и закону ея поучатися день и нощь научи на устроение и возграждения сущим под рукою людем иже теплотою яже к Богу любве, все же он благочестивейший великий государь царь разумев спасение смотрения, и Бога взыскав по глаголющему слову: ищай Господа обрящет разум с правдою, право же ищущии обрящут мир. Иде же бо еста два или трие собрани во имя мое ту есмь посреде их, господьский глас рече.
Озаривжеся светом богоразумия благочестивийший, тишайший, самодержавнейший, премудрый великий государь царь и великий князь Алексий Михайлович всеа великия и малыя и белыя России самодержец повелев собратися преосвященному собору богохранимаго его царствия всех епархий в преименитый царьствующий град Москву; в настоящее ж сие 168-е лето февраля в 16 день, повелением его великаго государя царя собрашася (В подлинной рукописи исправлено, без перечеркивания: собрахомся. (Отмеченныя здесь курсивом буквы поставлены над строкою)) вси архиереи и архимандрити и игумени и весь освященный собор предсташа (Также исправлено без перечеркивания: предстахом) пред лицем благочестия его великаго государя царя и слышахом от святых его уст усердное его благочестия возглашение. Яко общая наша мати святая соборная и апостольская церковь пастыря и жениха не имеет, святейший патриарх господин Никон оставил престол свой волею, не советовав, рече, с нами великим государем, ниже призвав священный собор уступи никим же гоним и молим нашею державою не возвратятся, такоже и архиереов и прочих священноначалников и всего священнаго собора, обретшихся при отречении его моление презре, такоже и всенароднаго множества моления не послушав, отъиде и не возвратился на престол свой. И уже вдовствует святая соборная и апостольская церковь лето и месяц седмь. Да преосвященный собор разсуждают по правилам святых апостол и святых отец не имея кто ненависть ни тщетныя любви, но кийждо воспоминая страшный суд Христа Бога нашего, мы же, рече, приимше от вышняго повеления правления человеческого рода не токмо о своих пещися и свое житие править, но и о всех обладаемых державою нашею должны есмы попечение имети, понеже великая паче инех, яже в человецех еста дара Божия: священство же и царство; ово убо божественным служа, сие же человеческими владея и пекийся: от единаго же и тогож де начала, обоя происходита человеческое украшающа житие, яко же ничто же тако бывает поспешне царьству сего ради, яко же святительская честь, о обоих самех тех присно вси Богови молятся, аще бо он непорочни будут во всем и к Богу имут дерзновение, и праведна и подобна украшати начнут преданныя им грады и сущия под ними: будет согласие некое благо, всем еже добро человечестей даруя жизни, тако убо лепо есть православным царем и священником исполняти божественная предания без соблазна, несть бо ино что ниже величие Божие верным бывает, якоже правила церковная крепко держати.
Егда убо святыя и божественныя церкви безспакости и немятежно в мир бывают, тогда нам вся благая строение от Бога бывают подаема, мир и умножение плодом, и врагом одоление. Мы же священный собор слыша сия от благочестивийшаго великаго государя царя от святых его уст премудрейшее возглашение, с глубочайшим попечением по святей соборней и апостольстей церкве, яко перваго архиереа пастыря и жениха не имеет (Отсюда писано в выноске, на левой стороне столбца, до слов: Никона патриарха). Он же великий государь царь наутрие прислал ко священному собору в патриаршу крестовую полату болярина своего Петра Михайловича Салтыкова да призовутся свидетелие обретшийся при отречении господина Никона патриарха. И преосвященный собор, возгласив свидетелей (В документе значится так: И возгласив свидетелей, а над этими словами «И преосвященный собор» прибавлено рукою царя), вопрошахом в первых убо преосвященных митрополитов Питирима Сарскаго и Подонскаго, Михаила Сербскаго, архиепископа Иосафа Тверскаго и Кашинскаго архимандритов и игуменов, протопопов и всего причта церковнаго, обретшихся ту, таже и от царскаго сигклита и патриарша дому мнози.
Согласно вси по христов евангельской заповеди сказаша, яко он, предреченный господин Никон патриарх отречеся волею (Слово «волею» прибавлено над строкою рукою царя)своего патриарше… (Края столбца обгнили, букв не достает) престола, и моления их не послуша. И инии же от них сказаша, яко и клятся и к тому не возвратитися паки на свой патриаршеский престол. И егда оставляше господин Никон патриарше … престол, великий государь царь и великий князь Алексий Михайлович всеа великия и малыя и белыя России самодержец молил его патриарха чрез болярина своего князя Алексия Никитича Трубецкаго, дабы он господин Никон патриаршеского своего престола не оставлял, також-де и архиереи и весь освященный собор и всенародное множество обретшийся при отречении его, молиша его усердие да не оставляет престола своего. Он же господин Никон патриарх великого государя прошение и моление («И моление» прибавлено неизвестною рукою) презре и архиерейскаго и всего собора и всенароднаго множества моления не послуша, остави престол свой; оставя же и писанием подкрепи, писанным к великому государю, своею Никоновою рукою написался: бывший Никон патриарх.
Темже преосвященный собор, сия достоверныя свидетельства слышав, известно уверився, яко господин Никон патриарх остави престол своею волею никим же гоним, и умоляем не возвратися на патриаршеский престол. Уверившежеся мы преосвященный собор и выписав из правил святых отец разсуждающе обретохом его Никона чужда быти патриаршескаго престола и чести вкупе и священства, по девятому правилу третиаго вселенскаго собора, сие бо правило не повелевает отрекшагося архиерея паки возводити на архиерейство и не литургисати. По шестонадесятому же второ-перваго собора правилу, не токмо отрекшагося архиерея своего престола паки возводити не подобает, но и просте отшедшаго вящше шестих меяц чужда творит архиерейскаго сана и чести и священства, яко же и Матвей иеромонах, приводя во свидетельство сие правило, глаголет: безумно, рече, еже архиереом архиерейства убо отрещися, священства же и еще паки содержитися (В подлинной рукописи значится так: содержити(ся)). Сие бо правило иже множее шести месяц от своея отшедшаго епископии нужною некоторою виною и не возбраняема отпадати повелевает архиерейства и священства. Да аще убо иже менши согрешивый сице осужден бысть, како иже отнюд отрекийся архиерейства, и еже о стаде попечения во всем житии пренебрегу не паче ли множее томим будет. И паки архиерейство имя вещи есть и действа явителна, оттрясый же волею действо отпаде яко и звания, архиерей же зватися не будет, како священства держатся может. И паки иже бо имени не причастен, колми паче вещи. Подобие ж и по 72-му правилу Карфагенскаго собора, и по 18-му правилу Сардийского собора, також-де и по свидетельству о сих преподобнаго отца Никона. Бывый же патриарх Никон безпастырну остави церковь не шесть месяцев, но лето и десять месяц сим правилам повинна до конца себе сотвори и чужда архиерейскаго сана и чести, вкупе и Священства (Следущее за сим писано на обороте столбца до слов: богоносных отец преданию).
Сице убо и в воспоминании церковнаго соединения глава 53, аще убо которой епископ свою церковь оставит нищеты ради, или писанием отречется, или обид ради неких прилучающихся от злодействующих и буих властелей страной тоя, таковых не токмо не помиловати и извергати повелевают, и от общения отлучати. Сице убо и мы последующе святых и богоносных отец преданию Никону бывшему патриарху чужду быти архиерейства, и чести и священства. По правилу ж двадесятпятому 4-го вселенскаго собора, повелевающему внутрь триех месяц архиереа поставлять судивше на вдовствующий престол российский соборныя апостольския церкве новаго патриарха избрати, его же благодать Святаго Духа предизберет и великий государь соблаговолит. Бывшему же Никону патриарху не обладати ничем ни монастыри, ни вотчинами, а жити ему и питатися в монастыре, где великий государь царь и великий князь Алексий Михайлович всеа великия и малыя и белыя России самодержец укажет и святейший новопоставленный патриарх благословит.
И сия вся правила и предреченная свидетельства трикраты предлагахом пред лицем великаго государя царя и великаго князя Алексия Михайловича всеа великия и малыя и белыя России самодержца в его царских полатах. Он же, великий государь, правил святых отец и свидетельских ответов слушав, указал пригласить обретшихся в царствующем граде Москве греческих архиереов: преосвященнаго митрополита Парфения Фивскаго, преосвященнаго бывшаго архиепископа Кирила Андроскаго, преосвященнаго архиепископа Нектария Поганиатьскаго, и выписать из правил святых апостол и святых отец, и быти им для свидетельства на соборе. Они же гречестии архиереи выписаша из правил святых отец во всем согласно с преосвященным российским собором, и единомысленно рекоша Никона бывшаго патриарха чужда быти архиерейства и чести и священства, и ничим же обладати, и на его место иного архиереа возвести и руками своими подкрепиша.
Паки ж преосвященный собор предстахом пред лицем великаго государя царя и великаго князя Алексия Михайловича всеа великия и малыя и белыя России самодержца, предлагающе сие согласное писание с нами ж и предреченнии гречестии архиереи и согласно вси вещающе чужду быти Никону патриаршескаго престола и чести вкупе и священства, и ничим не обладати яко же и выше речеся.
Он же великий государь царь и великий князь Алексий Михайлович всеа великия и малыя России самодержец, разсуждая премудре, благоразсудне и праведне с своим царским сигклитом, повеле тако быти по правилом вышеписанным святых отец и по свидетелству оных достоверных свидетелей и по согласию всего освященнаго собора, и соборное сие писание совершити и руками всему освященному собору подкрепити в соборной и апостольской церкве при себе великом государе царе и великом князе Алексие Михайловиче всеа великия и малыя и белыя России самодержце и при своем царском сигклите.