Сайту требуется оплата, собираем посильную помощь ПОЖЕРТВОВАТЬ
Дышу Православием
Популярное:
<a href="http://thisismyurl.com/downloads/easy-random-posts/" title="Easy Random Posts"></a>

Послание Паисия, архиепископа Константинопольскаго

Деяния Поместного Собора 1654 г. Московского


К оглавлению

К разделу


Послание Паисия, архиепископа Константинопольского Новаго Рима и Вселенскаго патриарха, к святейшему Никону, патриарху Московскому и всея Великия, и Малыя, и Белыя России, о неких нужнейших винах церковных.

Чин боголепый, пресущественным манием Божиим в небесном священноначалии благоучиненный и тамо опасно хранимый, яко по возсловию в богоначальствуемом священноначалии церковном хранится, есть проявленно. Ибо, понеже глаголет великий Дионисий, чин священноначалия есть овемубо очищатися, овемже просвещати. Яко в небесном священноначалии первопредстателнии и превышнии священноначалницы, к трисиятелному непостижимаго божества свету приближающеся и того боговидными зарями безсредственне озаряеми, светозарными богоразумия им откровеннаго лучами, нишшыя священноначалники просвещают, и имже сами божественне научишася, я научают. Престолы убо, глаголет великий Афанасий, и серафимы, ы херувымы безсредственне от Бога учатся, яко всех вышшии и Богу приближающийся. Сии же учат нишшыя чины. Тако в церковном священнодействуется священноначалии, еже небесное есть и законное общителне средою краев касаищеся. Овому убо, по божественному Дионисию, общащеся видений, овому же яко и образы чювственными упещряется и теми на божественное возводится. Вышний бо священноначалницы великолепою священноначалническаго сана добротою благочестие удобрени и на превысокий богоданныя им власти престол боговозведенни, яко светоноснии суще церковнии светилницы и, по словесу Христову, «свет миру», светозарными богословия лучами благоподчинныя священноначалники просвещают, от священноначалствуемых мрачную умовреднаго невежества тму прогоняют, и сами свышше световодителствуеми, еже онем к первому свету Богу, в живоначалной Троице едину, приближитися, очищающе я и совершающе, благочинно световодителствуют. Убо елма священноначалническим световодителством наставляеми, священноначалствуеми яко к первому, несозданну, невещественну, пресущественну, пребожественну и пресветлу Свету, примрак под ногама имущу, Богу, всяческих Содетелю, темень неведения, мрак разрешающе, приближаются. Тако не токмо сокровенная чтожестваи действа божественных в Церкви апостольстей богоустановленных тайн, ихже, по божественному Златоусту, нювственни убо вещи вся же мысленная истинно познавают6, но и таинственная совершаемых во святой литургии священнодеиств знаменования постизают боголепно световодителнии священноначалницы, с велегласным Исайею, пророком Божиим, ко священноначалствуемым глаголюще: приидете, да ходим светом Господним, ко еже пренебесному Свету, всякаго человека, в мир грядуща, просвещающю, последовати; и яко к ведению божественных тайн, тако к познанию священнодействителных знаменований световодителствовати я должнствуют. Но понеже, что святая, соборная апостольская одушевленная Церковь с вещественною церковию, в нейже божественныя тайны совершаются; что божественный жертвеник и благословенная трапеза, на нейже безкровная жертва всеблагому Богу приносится; что катапетасма трапезная, литон священный, фимиатон с фимиамы, и священноначалническия с священническими ризы, в няже священницы облекшеся, таинственне священнодействуют; что хлеб и вино, ихже ов убо в пречестное тело Христово действом всесвятаго Духа пресуществуется, ово же в пречистую кровь Христову прелагается; что амвон церковный, олтарь божественный, священныя сосуды и прочая премногая таинственная священнодейства, на божественной литургии совершаема, знаменуют, — не вси священнии православныя российския Церкве причетницы известно веждествуют — сего ради, яко пресветлый православный христолюбивый и боговенчанный государь царь и великий князь Алексей Михайлович, богопоставленный всея Великия, и Малыя, и Белыя России самодержец, о богоугодном правлении и разширении благочестиваго царствия Российскаго, о защищении православныя Церкве апостольския, о умирении всего мира правовернаго и о освобождении всего христолюбиваго рода христианскаго боголюбезне и благоревностне печется, тако богоизбранный святейший патриарх Московский Никон, первопрестолный в богоначалствуемом православныя Церкве российския священноначалии священноначалник, богоданный в световодителствовсея Великия, и Малыя, и Белыя России световодитель и благотщаливый словенскаго стада Христова, пастырству своему врученнаго, пастырь, оное благовонным евангельскаго учения пажитию питая, животными богоприятных наказаний водами напояя и на правую богоугодных жития стезю наставляя, о благоустроении церковном, о разширении православныя веры апостольския, о умножении правовернаго благочестия и о еже всему священному российскому причту церковному во известное священнодействителных знаменаней ведение приведенну быти благоусердно печется. Яко бо древле патриарх Иаков в напоение овец безсловесных веществен камень от вещественна кладезя отвалил есть, тако он ныне мысленный неявленнства, паче же невежества, во многих уме лежащаго, камень, во еже словесным овцам Христовым чистою и известнаго священнодействителных знаменований ведения водою напоеным быти, от мысленнаго таинственных священнодейств кладязя отвалити потщася. Его бо священноначалническим, богоугодным, опасным, благопоспешным и душеполезным тщателством благополезная книга, богомудрое божественная литургии толкование, благоявственное таинственных священнодейств сказание и досточюдное всех священных вещей знаменование в себе содержащая, и со греческаго на славянский диалект преложися, и в велию духовную всего священнаго православныя российския церкве причта ползу типом издася от достохвалнаго, богоприятнаго, ползоноснаго, благопотребнаго священноначалническаго тщателства, имже в воспитание мысленнаго стада Христова благовонный истиннагоучения пажить уготовляется, неботечная тайноводителных ведений вода от чистаго таинственных богомудрований кладязя, богомудрыми учителми церковными ископаннаго, в напоение словесных овец Христовых почерпается, боговожделенное во удобрение дому Божиаго благолепие устроевается и преудобренный чин церковный богоносными Отцы святыми богоучиненный опасно соблюдается. Сей бо первопрестолный священноначалник, гласом вопиющаго в пустыни реченное: правы творите стези! благотщателне исполняя, правы стези творит, скривленное исправляет, косвенное отметает, нетропотное соглаждает, любяй благолепие дому Божия и с богодухновенным псаломником глаголяй присно: Господи, возлюбих благолепие дому Твоего!, о благолепии дому Божия опасно печется, видяй божественным Павлом реченное: вся же благообразно и по чину да бывают, да вся таинственная священнодейства, в православней российстей Церкве в честь и славу Божию благолепие совершаема, по благолепному богоносными Отцы святыми благоучиненному чину церковному бывают, прилежно тщится. Еже кому несть благопроиятно? кому несть радостотворно? кому несть любезно? Воистинну, яко благоискусным и богомудрым преудобреннаго благочиния церковнаго любителем есть любезно, тако неким неискусным и самомудрым, паче же суемудрым, скаредновиднаго безчиния рачителем есть ненавистно. Сии бо темным умовредныя ненависти или дебелаго неведения мраком душевредне омрачившеся и мысленная очеса своя, во еже на светлую исправлений лучю не зрети, смеживше, яко древле непокоривии и жестосердии сынове израилтстии на пророка Божия боговидца Моисея и превеликаго священноначалника Аарона буйственне во свою пагубу пророптати дерзнуша, тако на первопрестолнаго священноначалника богопоставленнаго, российския Церкве правителя богоизбраннаго, церковнаго священноначалия чиноначалника, световодителнаго таинника, в пагубоносное души своея повреждение злокозненне роптати дерзают. Оле пагубоноснаго роптания! Оле, несмысленнии ропотницы! Не весте ли, яко Коредафай и Авирон, на богоизбраннаго священноначалника Аарона безсловесне пророптавше, погибоша, яко живи во ад снидоша, яко кущи их, доми их, скот их и людие, сущи с ними, землею пожерты и покровени быша, яко и от иных ропотных сынов израилтеских ови убо огнем сожжени быша, овии же от всегубителя потребишася? Но понеже неции от израилтян новых или умовредною завистию воздвижении, или дебелым невежеством помраченни, в пагубную роптания злобу устремляются, да в глубокую душевредныя погибели пропасть не устремятся, с божественным апостолом рещи к ним подобает: не ропщите, якоже неции от них поропташа и погибоша от всегубителя, но вся творите без роптания и размышления, да будете непорочни, и цели, и чада Божия непорочна. Убо сии, аще чада Божия непорочна быти вожделеют, воистинну Бога беззавистна и человеколюбива подражати вожделеют, многокозненну зависть истребят, искренню любовь в сердце своем насадят, богомерзкое безчиние возненавидят, боголюбезное благочиние возлюбят и самому первостолному церковнаго священноначалия чиноначалнику во всем благоумне покоршеся, досточестная воздадят о сем благодарения, яко он о благолепии дому Божия усердно радеет, о благочинии церковнем благотщателне печется, о совершенном божественных правил богоносными Отцы святыми благоустановленных хранений прилежно опаствует и о истовом исправлении книжном и истинном душеполезных книг греческих на славенския преложении опасно тщится. Его бо святителским тщательством сия благополезная и богомудрая книга с греческаго на славенский диалект ныне преложися и во общую душевную всего православнаго рода российскаго ползу по его священноначалническому благословению лета седмь тысящ 164-го13 году, месяца октоврия, типом издася.

Источник — Скрижаль. Акты соборов 1654,1655,1656 годов. —СПб. «Свое издательство», 2013. — 640 с. ISBN 978-5-4386-5194-9

Радио «Вера»
Наши друзья


© 2015-2019. dishupravoslaviem.ru. Все права защищены.


Статистика просмотров сайта


Яндекс.Метрика