Деяния Поместного Собора 1660г.
Выписки из правил апостольских и соборных, сделанныя греческими архиереями, призванными на собор против патриарха Никона 1660 года
Печатается по изд.: Гиббенет Н. А. Историческое исследование… Т. 1. С. 193 и далее (примечания к тексту взяты также из этого издания).
Во Имя Отца и Сына и Святаго Духа Аминь.
Правило святых апостол 14.
И епископу не подобати оставльшему свою епархию на иную скочити, аще и от вящих понудится, аще неблагословная вина некая будет, яже сие творите понуждающи его яко вящи, что приобретению могущу ему тамошних словом благочестия ползовати, и сие ж не от себе, но судом многих епископов и умолением величайшим.
Правило 25.
Епископ, или презвитер, или диякон, в клятвопреступлении пойман, да извержется.
Правило 34.
Епископам коегождо языка ведати подобает иже в них перваго и непщевати его яко главу, и ничто же деяти вящее кроме его намерения; оно ж токмо деяти коемуждо елико во епархии его достоит и яже под нею в странах. Но ниже он кроме всех намерение да творит что. Сице бо единомыслие будет и прославится Бог Господем во Святем Дусе Отец, Сын и Дух Святый.
Правило 37.
Дважды в год собор да будет епископов, и да разсудят между собою догматы благочестие и впадающая церковная противословие (На поле: распры) да разрешат.
Намерение (На поле: знаменуи) четырех сих апостольских правил и вина, что обдержат и почто писахом их и что пристоит в вине сей патриарха господина Никона, есть впредь толкование яснейшее вкупе с толкованием девятые и десятые главизны от царскаго закона приснопамятнаго царя Иустинияна.
Правило святаго 4-го собора, глава 25.
25-е 4-го собора правило епископов рукоположение внутрь трех месяц бывати повелевает, у (Вместо — у, следует читать: в) них же оных подобает рукоположение; не бо на иного подобает церквей людем пустым быти пастырей промысла, и яко же случися носитися, токмо еще не от вины благословные случилося бы удолжатися времени и преложитися рукоположению, от варваров негли пленившуся граду; а иже не тако творящим церковным запрещением подлагатися.
Толкование.
Намерение сего правила есть, яко аще и умрет архиерей, паки да не стоит она епархия кроме пастыря вящи трех месяц, кроме не быти некой великой нужде, но да имут попечение прочие предстоятелие и собор рукополагати иного внутрь трех месяц. Аще ж не брегут церковным запрещением подлагатися, понеже настоящее правило повелевает: да запрещаются они, аще не пекутся о рукоположении и епархии, яже есть вдовеющи; колико наипаче запрещен будет свой и истинен архиерей, еще жив сый, оставляти церковь свою и престол свой и ходити тамо и семо, кроме единые нужды или требы великие церковные или царские. Не бо на много подобает церкве и людем пустым быти пастыря и промысла и яко случися носитися, аще не от вины благословные, глаголет правило.
Правило глаголемаго 1-го и 2-го собора, глава 16-я, не рукополагаться кому повелевающее в церкви, ея же епископ сице настоящий не у своея совершенные подвижеся чести, аще и от неких о согрешениих оклеветан бысть и малодушествова неглии отречение сотвори, спря бо и метежи виновные сие. Подобает же церковным всякие вражды отбежати, но правилне яже на него испытовати и аще по слову (На поле: лепо) отречение бысть или правильне за согрешение изверзеся, тогда иного на епископство рукополагати. Но и аще кто во своей чести добре стоя и не своих хощет пасти людей, но своего отступ стада паче шести месяц на ином пребудет месте, ничесому нуждому возбраняющу, епископства чести и седалищу отъятися.
Толкование.
Тоежде правило две вине имет: 1-е обдержит, егда архиерее оглаголют нецыи за некое согрешение и негли он архиерей за согрешение, еже глаголют ему, малодушествует и отягчится и отступит от престола своего, да не рукополагают иного абие, дондеже соберется собор испытовати и судити вину по правилом та же яко же собор изречет по вине и по приличному вины и бываемых. Се и в сей части тояжде главизны, яко возможно собору рукополагай иного, аще и есть другий жив, по изречении суде собора по делу, еже случися и бываемая. Кроме собора и испытания просто и яко случися повелевает правило не рукополагайся иному кроме правил, но по правилом рукополагается.
Вторая часть тояжде главизны имать вину сице: яко который архиерей, его же никто же оклеветав, за некое согрешение, но есть тверд в чести своей и не пасет людей своих, но оставит престола своего и ходит по иным местам вящи шести месяц, кроме нужные потребы царские или церковные, или возбранялися немощию или иною тяжкою нуждой не приити ему на престол свой, иже кроме нужных треб ходит вне церкви своей вящи шесть месяц, повелевают святии отцы святаго того собора, яко кроме единого иного суда, праведно да извержется и да будет ин на престоле его.
О отречении епископа святый Кирил пишет в 3-й главизне к Домну послание: еже оставити бо глаголет священнодействующим своя церкви, церковным неугодно есть законом, достойни бо суще служити, не подобает творити отречение, аще же недостойни не от отречение да исходят (На поле: знаменуи), но от явленных согрешений. Аще же и отставляти кому епископство случится, и его же(На поле: Матфей) уверися стадо отставите имети литоргию паки не было б праведно(На поле: сиречь не подобает служить). Не разумно бо злому и тяжкому оставляти председание (На поле: преспевание), учение глаголю, и еже людей к лутчему ращение и еже в силу возбраняти, еже к худшим сих ношение. Еликож чести держати и присвоите удобство вящи душ прилежание сотворяющу. Показуется же и от 16-го правила глаголемаго 1-го и 2-го собора: лишнее сице изреченных безумие еже мощи явя архиереем епископства убо оставляти, священство же паки держати. Сие бо правило, иже вящи шести месяц своего отшедшу епископства нужною коею любо виною не возбраняющуся, отпасти повелевает епископства и священства, аще же иже менши согрешивый сице осудися, како единою отстав епископства и еже стада попечение презревый, не наипаче мучится, елико еже о нем лепо, волком оставль увереное ему от первопастыря Христа священное стадо; не яко яже честь ему подобает священства первенца; о нем же и десятое правило святаго Дионисия поведает, аще убо иже в начале на предстательство людей призываемые, правила отлучится повелевают, аще не бы покорилися, кто от ум имущих удоб поведенных приял бы отречение, но неконечно яко же могл бы сих мучите. Иноко епископства имя вящи есть и действо явительное, отрасивый же волею действо паде яве и от звания (На поле: и от церкве). Епископу ж зватися не лепо, како священно удержит, какож и святитель зовется, иже причта не имый под собою, ниже начальник священных. Зде не подобает святительства имя иного убо подобает сего действа, иже бо имяне не причащалися упразнением вещи, не подобает убо приимати просто отречение, аще недостойна кто себя священства исповесть. Сему же показуему вкупе отречением и всякаго священническаго достоинства отрицалися отпадет.
Знаменуи.
Яко сия строка, яже глаголет, не подобает убо приимати просто отречение, аще недостойна кто себя священства исповесть, являет от архиерее, иже отягчаяся в попечении церковном, молится при соборе, да примут отречение его; обаче людие любят его и хотят, и сего ради повелевает тойждо правило оного да не примут отречение удобно. Но иже оставит престола своего сам и ходит вне престола своего зле вящи шести месяц или лето, якоже повелевают и закони приснопамятнаго царя Иустинияна, сицеваго везде правила и законы изрекают погубите и престол и священство вкупе.
Послание святаго 3-го собора к сущим в Памфилии.
Но и от еже к сущим в Памфилии послание святаго и вселенскаго третьяго собора о некоем Евстафии показуется право призирающим оставляющий церковь обою вкупе отпасти, епископства и священства, еще же еже всяко оставляли архиереем епископства не быти виновату. Сей бо Евстафий, епископ сий Памфилийский и во обстояние (На поле: в скорбь)пад и потрудився от малодушия и безмолвие писано остави епископство, а тамо убо ин рукоположися. Он же плакася по священному приступи по сих собору, не церковь воззываяй, ниже имущему сию сумняйся, имя ж и честь имети епископу токмо ища, иже и слезами и глубокою старостью умолени бывше Евстафиевою, и да нечто ему случится от безмерные печали, благоговевшая имя епископа имети его оправдися и честь и причащения якож внутрь жертвенника входяще причаститеся, ниже священнодействовать ниже рукополагати, аще не повелен был бы от намеснаго епископа. Сия же неправильно рекошася святым, но смотрение употребившим и необычное снисхождение, яко же иже послание прилежно преходя (На поле: чтый) явя увесть.
Закон самодержца и приснопамятнаго царя Иустияна, главизна 9-я.
Возбраняем же благолюбезных епископов своя оставляти церкви и во иные епархии преходити. Аще же нужда некая еже сотворити сие случится не инако, но токмо с грамоты блаженнейшаго их патриарха или митрополита, или по царскому яве повелению сие сотворити. Аще же и по сему образу епископ в которое любо место отыдет, не вящи единого лета свою да оставит церковь; а иже кроме сего нашего изображения, или отшедшим или чрез определеннаго лета вне своея церкви творящим пребывание, первие убо не доватися от строителей от своея церкви издивением, та же воспоминати их грамоты священническими под них же суть, яко же возвратился в своя церкви, продолжающихся ж возвратится, по священным зватися правилом и аще не внутрь определеннаго лета возвратятся во своя церкви, тем убо епископства изринутися, иным же вместо их лутшим рукополагайся по настоящаго закона силе.
Толкование.
Наследствующу самодержцу и приснопамятному царю Иустинияну правилом святых апостолов и святых соборов в настоящем утверди и царским законом и изречением, яко архиереем никому же оставлять своея церкви и ходити во иные епархии кроме грамот патриарха своего и кроме воли и повеления царскаго, митрополитом, епископом же волею и грамоты митрополита своего; аще же и по сему образу епископ отыдет или грамоты патриарха своего, или царским повелением, яко же выше речеся на потребу юже имяше, повелевает тойжде закон, яко и сице паки неоскудевати от епархии своея вящи единого лета. Аще же которые вне сего образа сиречь повеление того отшел бы куды кроме грамоты патриарховы или кроме повеления царскаго, или аще идет с грамоты и повелением и умедлит вящи единого лета кроме престола своего и от епархии своея, первый убо от вход церковных его ничто же издивение давати ему, та же воспоминати их священником с грамоты да и придут в церковь свою; и аще не возвратятся внутрь единого определеннаго времени, тех убо от епископства отринути и иных вместо их лучших рукополагати.
Прочее.
И в настоящем законоположении и законе царском есть противник господин Никон патриарх, яко аще и хощет рещи, яко сам есть патриарх и требу от иного не имать взяти волю и грамоты, зане есть негли обладатель сам, но погрешает аще рекл бы сие, ибо имать выше себе законов и правил святых апостол и святых собор, царя и царских законов, но иже по месту архиереов собор может по правилом повелевать ему: по 14-му правилу святых апостол и по 34-му. Четвертоенадесять правило святых апостол повелевает, яко не подобает архиерею оставляти епархию свою и итти во иную епархию, аще и от вящих человеков понудится, хотя бы случится быти благословное вине за некую пользу церкве Христовы о благочестии. Паки и сице от себе не идти, но судом многих епископов и умолением величайшим. Се и настоящее святых апостол правило возбраняет всякаго архиерея волю, хотя есть и патриарх, и дает вящи власть собору. И паки 34-е правило повелевает, яко архиереем коегождо языка подобает познати перваго своего и ничто же творите вящи кроме его намерение, но ниже он кроме всех намерение да творит, что се паки и по правилу сему не имать власть всю сам во всех творите вся и за вся во всех, яко же сам хощет, хотя есть и папа, но имать собор вящую власть, и подобаше и ему, яко что хотел творити, да сотворил бы советом собора. И понеже и по закону настоящему приснопамятнаго царя Иустинияна воспомянися и возвестися грамоты не священников, но самодержца царя; но и повелением царским и от архиереев и князей призван бысть, егда отречеся и не восхоте обратитеся внутрь лета. Убо по правилом святых апостолов и святых соборов и по силе тогожде царскаго закона тому убо от престола изринутися, иному вместо его рукополагатися невозбранно.
Тогожде самодержца и приснопамятнаго царя, глава 10-я.
Да все-ж церковное установление и божественное правило прилежно сохранятся, повелеваем единому коемуждо блаженнейшему архиепископу и патриарху и митрополитом, боголюбезнейшим епископом, иже под ними сущим в тойжде епархии, единою или дважды на всякое лето к себе созвати и вся вины прилежно испытовати, яже епископи или клирицы или манаси между собою имут, и сия располож и по церковным правилам, от котораго бо любо лица согрешися исправлятися.
Толкование:
В настоящем законе наследующу, тойждо приснопамятный царь, 37-му правилу святых апостолов и 5-му правилу святаго и вселенскаго 1-го собора Никейскаго, повелевает, яко коеяждо епархии первый да призовет епископы своя во всякое лето дважды в лето или единожды в нее, да разсмотрят и исправят всякую вину церковную, или распрю, которая яже случится между церковными человеки или ино что сопротивное еже случится исправляти е с добрым образом; да будет мир в церкве Христове и да сохранятся божественное правило и церковное установление со всяким прилежанием и мирным постоянием.
Прочее убо.
Подобаше и господину Никону патриарху творити, аще и имяше от некоего некую нужду или бяше некий противник в церкве Христове или на него, или сотвори ему некий некое зло, или позна, яко хотяху ему творити нецыи зло или имяше хотение свое и потребы нужные и хотяше идти во своя службы и оскудевати часнаго времяне от престола своего, по правилом святых апостол и святых соборов и по царским законам, подобаше призвати архиереев страны творити собор за всякую вину, юже имяше, испытовати и судити по правилом и исправляти вся добрым образом, да будет мир и благочиние в церкве Христове; или хотение ради и нужных потреб, яже имел бы, и нужда была бы посетити самому от престола своего на часное время, подобаше взяти волю и повеление от тишайшаго и самодержца царя и от собора прощение.
И паки, аще и сице сотворите и идите волею царя и собора, паки подобаше по божественным законам не ходити вне престола своего вящи, елико повелевают божественная свищенная правила и законы, и понеже сам сотвори все сопротивное, се есть повинен и погрешен в правилах свитых апостолов и святых соборов и в законех самодержцев и приснопамятных царей. Явлено есть всем, яко от всех бывших патриархов прежде на Москве, ин не возлюби нас греков якож святейший господин Никон патриарх, и чину восточные церкве не последова ин, яко же сам он, и аще и есть друг наш зело, но что можем сотворите понуждаем от божественных правил и законов; не возмогохом творити инако, токмо писати всю истину, яко повелевают божественные законы и правила святых апостол и святых соборов и закони приснопамятных и самодержцов царей (Здесь оканчиваются черновые столбцы).
Толкование яко вкратце.
14-е правило святых апостолов повелевает, яко епископ, сиречь всякий архиерей, да не оставит епархию свою и пойдет во ину епархию кроме совета собора, аще случитси и благословная вина, за пользу веры и церкви. Понеже и во благословном деле повелевает тойждо правило не идти архиерею кроме совета собора, колико наипаче во ином хотении своем есть возможно идти инуды, оставляющу престола своего на долгое время и не запрещену быти. В настоящем правиле пристоит патриарху, хотя и не сотвори отрицания, токмо за еже оскудети толико время от престола своего кроме нужные потребы и кроме совета собора, есть повинен сему правилу.
25-е правило отвергает клятвопреступника архиерея и священника. И в сем пристоит: аще патриарх заклялси и проклялся, яко вящи не требует патриаршества, якоже глаголет нецый, и аще есть сие истинно, ниже искати вящи патриаршества есть возможно, яко извергается.
34-е правило повелевает: архиереем коегождо языка яко подобает ведати перваго своего и ничтоже творити ни во единой церковной или иной вине великой кроме его намерение; но ниже самому первому творити подобие нечто кроме всех намерение.
В настоящем правиле пристоит ему: ибо аще имяше дело нужное, яко же глаголет нецый, еже глаголют ныне, и не бяше возможно инако творити, токмо идти самому творити их дел, подобаше творити е советом и хотением тишайшаго царя и собора, и сего ради есть повинен и сему правилу.
37-е правило повелевает, яко дважды в лето да будет собор архиереев во всякой епархии, церковных ради вин или распр или иных потреб, случающихся между архиереями и прочими церковными человеки, испытовати и исправляти вся добрым образом, да будет мир и единомыслие в церкве Христове. В настоящем правиле пристоит ему: ибо яко же глаголаше и глаголет, яко не послушаху его и не покоряйся ему причтеи и людие епархии его и обретахуся сопротивницы ему в церковных и во иных многих, подобаше собор архиереев созвати, судити и исправляти вся с собором, якоже подобаше всякие вины, но неуныватися и гневатися, отрицатися и бежати с гневом от церкве своея и престола своего; и сего ради есть повинен и сопротивен и сему правилу.
16-е правило глаголемаго 1-го и 2-го собора повелевает чисте и яснейши во 2-й части тояжде главизны, яко который архиерей оставит престола своего со отрицанием или и кроме отрицания и ходит инуды вне стада своего, кроме нужды великие возбраняющия вящи шести месяц, известно изрекает: епископа чести и седалищу отъятися. Сие правило, хотя и нетворяше отречение, извергает его токмо зане оскудевает толико время от стада и престола своего.
О отречении архиереов яснейши пишет Матфей Властарь и показует от святаго Кирила еже к Домну послания, и от десятаго правила святаго Дионисия патриарха александрейского и от послания святаго и вселенскаго третьяго собора еже к сущим в Памфилии, и изрекает, яко который архиерей отречется престола своего и стада своего, да обнажится абие и священства своего. И яко вящи является погрешен той, иже сам отречется, нежели он, иже за согрешение извержется, зане котораго за согрешение извергают, может той искати суда и собора, а иже волею отречется престола своего, вящи ни едино праведно имать, ниже что рещи, ниже что вящи ино творити, токмо стояти во оном, еже сам изрече себе.
9-я Главизна от закона приснопамятнаго царя Иустинияна обдержит и изрекает, якоже и 14-е и 34-е правила святых апостолов и 16-е правило глаголемаго 1-го и 2-го собора, яко не оставляти архиереем своих епархий и ходити по иным епархиям кроме нужные потребы и кроме повеления царскаго. Аще же который архиерей, или тако или инако, оскудеет от престола своего вящи единого лета, он убо да извержется, ин же вместо его да рукоположится.
Проче вся правила святых апостолов и святых соборов и царскии закони содержат и изрекают, яко который архиерей и кроме творити отречения, токмо ходити вне церкви своея кроме нужные потребы церковные или царские, и оскудети от престола своего шести месяц или по снисхождению царя Иустинияна единого лета вящи кроме возбранену быти от великие нужды, той убо да извержется и ин да рукоположится кроме ни единаго возбранена. Аще же который сам отречется престола своего своим произволением, ни едино правило обретается ниже закон кто помогати и оправдати его имети волю и праведно искати паки престола своего; но стоит токмо власть и воля в совете и власти тишайшаго царя, собора и синклита: аще им есть нужный и потребен снисходити, паки призвати его на престол его есть возможно, яко же является в писании, еже бысть и иногда. Аще же ни по правилом и законом ни едину власть имать вящи искати от престола чесого иного только (Ветхая часть столбца прогнила и нескольких букв нет) живо питание свое в нем же царь самодержец и синклит умилосердятся и упокоят его и в которой мере повелевают обратитеся и меритеся, в той послушати мирствующу и молящи Господа Бога о величайшей державе самодержца и тишайшаго царя и о благочестивых всех ищущему и спасения души своея во Христе Иисусе Господе нашем, ему же слава во веки. Аминь.
Выписано из правил святых апостол главы 14, 25, 34, 37.
И на те главы толкование их.
4-го собору глава 25 правило от Матфея и толкование их.
Правило 1-го и 2-го собору глава 16 от Матфея и толкование их.
Правило от Матфея: «которой епископ отвержется».
Слово святаго Кирила о том же.
Толкование о том же Матфеево и Кирилово.
От послания 3-го собору к Памфилию правило от Матфея.
От правила царя Иустинияна главы 9 и 10 и толкование их.
Слово их от евангелия и от послания святаго апостола Павла и от библии ответ на все статьи.
А переводить бы старцу Епифанию.
Выписано из правил святых апостол главы 14, 25, 34, 37.
И на те главы толкование их.
4-го собору глава 25 правило от Матфея и толкование их.
Правило 1-го и 2-го собору глава 16 от Матфея и толкование.
(И прочее все что и в предъидущем столбце, а в конце написано).
А переводить бы старцу Епифанию, а Арсению бы не переводить.
А Борис Богомолцев достаточно переводить знает, переводит греческий язык, который пишут просто, а еллинского языка переводить не умеет.