Деяния Поместного Собора 1660г.
Поместный Собор 1660 г. Соборное определение 27 февраля
(Приводится по изданию: Дело о патриархе Никоне. СПб., 1897. С. 53 и далее, — где имеет название: 1660 г., Февраля 27).
В лето от создания мира 7168, от воплощения же Господа Бога и Спаса нашего Иисуса Христа 1660-е, повелением благочестивейшаго великого государя царя и великого князя Алексея Михайловича, всея Великия и Малыя и Белыя Росии самодержца, собрашася преосвященнии митрополиты и архиепископы и епископы, архимандриты и игумены и весь освященный собор.
Собрашажеся вины ради сицевы: понеже пред сим летом предвоспомянутыя осьмыя тысящи во 166-е случися святейшему Никону, патриарху Московскому и всеа Росии, свой патриаршеский престол оставити, и в нынешнее вышеписанное лето, Февраля в 16 день предсташа весь преосвященный собор пред лицем великого государя царя и великого князя Алексея Михайловича, всеа Великия и Малыя и Белыя Росии самодержца, и слышаша от святых уст его велие попечение, зане святая соборная церковь пастыря и жениха не имеет, да преосвященный собор о сем крепко и единодушно праведне, не имея кто ненависти и тщетныя любве, по правилом святых апостол и святых отец, разсуждают, памятуя кийждо страшный суд и воздаяние комуждо по делом его. Они же преосвященный собор слышаша премудрейшее его великого государя повеление, идоша в крестовую патриаршу полату, и на утрие, Февраля в 17 день, по его великого государя царя и великого князя Алексея Михайловича, всеа Великия и Малыя и Белыя Росии самодержца указу, боярин Петр Михайлович Салтыков принес на собор скаски писмяные. И преосвященный собор прияша скаски и свидетелей, против сказок на соборе допрашивали священного чину по священству, а прочих по святой Христове евангилской заповеди.
В скасках Преосвященного Питирима, митрополита Сарского и Подонского, и боярина князя Алексея Никитича Трубецково написано: патриарх Никон патриаршества своего отречеся с клятвою; а в прочих скасках во всех о отречении патриаршества его написано: отречеся патриарх патриаршества своего во всех согласно, и впредь на патриаршестве обещася не быти.
И преосвященный собор, сказок слушав, познали: святейший патриарх Никон оставил свой патриаршеский престол своею волею, и о том посылал доложить великаго государя царя и великого князя Алексея Михайловича, всеа Великия и Малыя и Белыя Росии самодержца, боярина Петра Михайловича Салтыкова о указе. И боярин Петр Михайлович, пришед на собор, сказал, что великий государь царь и великий князь Алексей Михайловичь, всеа Великия и Малыя и Белыя Росии самодержец, указал преосвященному собору выписать из правил святых апостол и святых отец о отшествии бывшаго патриарха Никона; а у выписки указал великий государь быть преосвященному архиепископу Маркелу, Вологоцкому и Белоозерскому, и преосвященному архиепископу Илариону, Рязанскому и Муромскому, и преосвященному Макарию, архиепископу Псковскому (и) Изборскому, Чюдова монастыря архимандриту Павлу, Александрова монастыря Свирскаго игумну Симану.
И по указу великого государя царя и великого князя Алексея Михайловича, всеа Великия и Малыя и Белыя Росии самодержца, преосвященный собор велели выписать из правил святых апостол и святых отец, а у выписки велели быть преосвященным архиепископом Маркелу, Илариону и Макарию и архимандриту Павлу и игумену Симону.
Выписано из правил святых отец из Кормчей книги.
Перваго и втораго собора в церкви святых апостол правило 16, лист 221.
Ни по которому же образу да не взыдет кто на епископию, еяже епископ жив есть; подобает бо вину изыскати, егоже хотят изгнати, и по извержении его другаго поставити. Аще который епископ нерадит о своем стаде, ни болезнию, ни церковным
повелением, ни патриарховым одержим, вящше шести месяц время от своея церкве отшед сотворит, епископского сана и чести да будет чюж.
В Матвееве книге иеромонаха сие же правило сице писано: Состава 4, лист 87.
Карфагенскаго собора правило 88-е, лист 153.
Не повелевает иже под оглаголанием бывшаго епископа от епископства изринути, дондеже еже о нем разрешится судилище. Тажде и шестонадесяте глаголемаго перваго и втораго собора правило яве заповедает, не хиротонисати кого повелевая в церкви, ейже епископ еще жив есть, и не у своея совершение отвержен бысть чести. Аще и от некиих о гресех обвинен бысть и малодушествовал негли остави епископство, крамолы бо и смущения виновно. Се убо подобает же церковным всяко любоненавистие паче отлагати, но правилне, яже о нем изтязовати. И аще по слову, рекше по правде, оставление епископства бысть, или правилне за согрешения извержен бысть, абие иного во епископство поставляти. Но и аще кто по своей чести добре утвержен не хощет пасти своя люди, но своего отступль стада множае шестих месяц, во ином провождает месте не некоей нужди удерживающей, епископия и седалища праведне отъят будет.
Того же книги состава 5, глава 28, лист 110.
От епистолия, яже к Домну, Кирила о отречении епископов.
Сим святый присуждает Кирил в третей главе, иже к Домну епистолия. Отрицати бо ся, рече, священнодействующим своих церковь церковным не угодно есть уставам. Достойни бо убо суще служити не подобает творити отречение; аще ли ж недостойни, не от отречения да исходят, но от указанных наших согрешений; аще ли же и отрещися кому епископства приключится и вверенное ему стадо оставити, держатися службы к тому несть убо праведно. Неразумно бо и неискусно трудное убо и не болезненное отрицатися председания учения глаголю. И люди к лучшему придание и елико по сим возбраняти еже на горшее сих поношение и елика же почесть приносят и похвалу содержати и усвояти. Небрежение и о множайшем еже о душах прилежание сотворшу. Показуетжеся и от 16 правила глаголемаго перваго и втораго собора излишно иже сице судящих безумие, еже мощи яве яко архиереом епископства убо отрещися священства ж и еще паки содержати. Сие бо правило и еже множае шести месяц от своея отшедшаго епископия нужною некоторою виною, и невозбраняема отпадати повелевает, и епископства и священства. Да аще убо иже менши согрешивый, сице осужден бысть, како иже отнюдь отрекийся епископства, и еже о стаде попечения во всем житии пренебрег, не паче же множайше томим будет, елико по того воли влеком оставль вверенное ему от перваго пастыря Христа священное стадо. Сему ж точию яко не томиму, но паче яко честь тому подаватися яже священства старейшинства, еже есть не по правилех и законех, о нем же и десятое правило святаго сказует Деонисия. Аще в предстателство люцкое призываемыя правила отлучатися, аще не повинутся, повелевают, кто убо от иже ум имущих без вины поставленных архиерей приимет отречение, а не последнее, елико убо силен будет сих мучить. Инако же еже епископства имя вещи есть и действа явителна, отрясый же волею действо, отпаде яве яко и звания, епископ же зватися не будет, како священства держатися может? Какож и иерарх назовется, еже есть и священником началник. Иже бо причет не имый и под собою, ниже убо начало будет священником. А ему ж несть иераршества имяна и много ж паче подобает ниже действа. Иже бо именю не причастен, колми паче вещи. Неприятно убо да будет просте отречение, разве аще недостойна себе кто священству исповесть. Сему же указану бывшу вкупе со отречением и всякаго священническаго достоинства отрицаяйся отпадет.
Вселенскаго собора 9-е, лист 91.
Терпити подобает Евстафиеви во епископии крепко: се бо всякому епископу должно есть; он же плещи дав неполезно отречеся, Феодор же в того место поставлен бысть; он же плачася и моляся чести прося неповинен; поставлей же в него место, имый яве того отречение, без греха есть.
Толкование.
Сей Еустафий, епископ Памфилийский, Памфилия же область есть Итталийская, убог сый и немогий церковных вещей правити и находящаго нам попечения строити и управляти, таковых отречеся церковных вещей правления, рекше остави епископию
писанием, и поставлен бысть в него место ин, именем Феодор; и потом на Ефеский собор прииде, моляся и кланяяся, не епископию хотяше паки прияти; аще бо бы и просил епископию паки, не быша его послушали единою тоя отрекшася и уже в него место иному в ней поставлену суще; но честь епископскую прося имети и общение. И оправдан бысть в ней от святаго собора без всякаго прекословия, якоже и епископом именоватися ему и честь святителскую и седалище имети и служити и поставляти презвитеры и дияконы, не по своему господству, ни своею волею егда хощет, но егда брат некий епископ повелит ему в своей церкве служити, или поставити кого по предложению и любове ради Христовы. Милосердием же сего святаго собора отцы и сие слово приложиша к сущему в Памфилии собору рекше, аще же о нем лучше нечто совещаете, или ныне или по сем. Се же есть или в праздну церковь не имущу епископа ввести того, или инако некако дарованием помощи ему.
А в Матвееве книге ермонаха состава 5, глава 28, тоже слово сице:
Но и от иже к сущим Памфилия посланы святаго и вселенскаго третияго собора о некоем Евстафии помазуется, иже праве сматряющим отрицающихся церковь обоего вкупе отпадати и епископства и священства. К сему ж еще и еже свесма отрицатися архиереом епископства не быти безгрешно. Сей бо Евстафие, епископ сый Памфилийский, в напасть впад и стужив сый от малодушия и неискуства, с написанием отречеся епископства. И ту убо ин поставлен бысть. Он же, плачася, священному приступи собору. По сих не церковь вспять иский, не имущему ея чесо пристужая, имя же и почесть имети епископскии прося. Они же и слез и глубокую старость устыдевшися Евстафиеву и да не ему нечто прилучится от безмерныя печали, убоявшеся, имя епископско имети оправдиша, и почесть и приобщение якоже внутрь святаго жертвенника входящу причащатися, ниже убо священнодействовати ему ниже хиритоню творити, аще не поведено ему будет от поместного епископа; сия же неправильне речена быша святыми, но строение сотворшим и необычно снисхождение, якож иже епистолию опасне прочитая яве уведети имать.
Помеснаго собора Сардикийскаго правило 18, лист 114.
О епископстем закоснении и о презвитерстем и дияконстем изложении заповеди да имут силу.
Толкование.
Да никоторый же епископ своего стада не оставляет и во ином граде вящше трех недель не пребывает. Се убо и презвитером и диаконом се правило повелевает, да и тии боле трех недель не оставляют своих церквей.
Кирила, архиепископа Александрийскаго, правило 3, лист 273.
Чрез церковныя заповеди еже писанием отрицатися епископии и приносити таковая писания неким святителем, аще бо достойни суть святителства да служат, аще-ли ни, да не отрицаются; но обличени бывше о злых своих дел судом да извергутся, егоже некогда Прокл от беды и страха и прещения неких, якоже реша, отречеся.
Карфагенского собора правило 72, лист 148.
Не подобает ни единому же епископу оставити господское седалище и на ини переселитися. Или во своих вещах упражняющуся, о своем престоли нерадети.
Толкование.
Не токмо от града во град преходити епископу различными правилы возбранено есть, но ни ветхия епископии оставити, идеже бе искони престол церкве его, и в другую церковь сущую в пределе его преити, и оныя честь в сию преложити правило се не прощает. Но ни в своих особных вещах упражнятися ему, паче потребы не оставляет и о попечении и о учителстве людей своих нерадети возбраняет.
Василия Великаго правило 17, лист 231.
Презвитер Вианор кленся и раскаявся за ускорение таковыя клятвы.
Толкование.
Сей презвитер Вианор от некоего притуждаем и не могий того стужении терпети, и от смущения клятся к тому не служити, и потом раскаявся служити восхоте. И вопрошен быв о сем Великий Василий, аще приятель есть; и повелевает, аще кается о ускорении клятвы — прияти его. Обаче не в соборных церквах служити ему, да не будет соблазн многим, но особно презвитерская действовати; рекше служити.
Из книги Григория Богослова. От предисловия 14.
Сто и пятдесят епископов, повелением царя Феодосия Великаго, приидоша от различных областей в Константин град на Македония духоборца преже составления еже о нем беседу, зело удивишася Григорию Богослову о богословия высоте и жития его чистоте и наречением общим престол Константина града сему утвердиша, едва повинушася многими молбами царевыми. Посем уведев некия от египетских епископ еще завидящих и наречением ругающимся, и три епископа того помянующа. Зависть убо уведев, умыслы изыти, яко да не прочим епископом и роду смущение к египецким будет его ради, и убо старость непщевав и недуг и невежество и неискуство и ины вины, и предлежащее изгласи слово. И много молив царя и собора, едва отпущен бысть к своему отечеству. Таже хиротонисавше Нектария, в его место, и прочая.
В Никонове книге во главе 21.
Паки угодно бысть, яко никому ж леть быти епископу оставите обласнаго своего седалища, и к некоей церкве, во строении сущей, ему отходите, или во своей вещи паче еже подобает намнозе упразняющуся, нерадити попечения и содержания своего престола. Ниже в Сардикии собор в 11-м правиле глаголет о сих: Епископу кроме церкви его. Глаголет же к концу правила: Аще кто мирянин во граде живый три неделя дний не входит в церковь, да отлучится от причащения. Аще убо о простых людей се уставиша, нелепо есть ни подобает ниже ползует епископу, аще никуюже тяжчайшу нужду имать или вещь неудобну намнозе далече быти от церкве своея и опечалити вверенныя ему люди. Вси епископи рекоша: сему совету зело быти подобнейшу повелеваем. Зри сие правило в разум приводит таковых о приобщении епископом, иже кроме престола их, и о взыскании искомем во время мира, пачеж законоположения. Такожде и грацкий закон рече: да ни кий же епископ вящше лета от своея остает церкви; аще ли се сотворит и познан будет правилне отключимаго патриарха или митрополита и не приидет, да ижденется от епископства и другий да поставлен будет. И другое завещание глаголет: яко аще епископ время от своея церкве останет, да не подает ему потребная строитель. Но таковая потреба да дается на церковныя благочестивыя изветы. О сих вся глаголне и пространне последуя взаконеным изложи иже в Констянтине граде во святых апостол собор в 16 правиле глаголя:
Яко (В подлиннике против этого места мелким почерком написано: Еже писано и в великой книге, слово 63-е) ради любопрений же и мятежа иже в Божии церкви случающихся, и се повеле нужно быти, еже ни единем же образом поставляти кого в церкви, ейже и еще настоятель жив есть, и во своей состоится чести, аще не сам епископства волею отречется. Подобает бо первее вине хотящему от епископства изгнану быть правилне истязуеме, в конец приводитися, и тако по извержении его другаго в него место на епископстве производити. Аще ли кто от епископ во своей состояся чести, ни отрещися хощет, ниже своя паствити люди, не от своея отступити от епископия вяще шестих месяц во ином ходя месте своея епископия, чести же и сана оттуждится всячески, иже бо вверенаго ему небрегий стада, и во ином месте вящше шестих месяц времене пребывающа, повеле святый собор архиерейства, егож ради паствити учинен бысть, всячески чюжу быти и в того место епископа иного поставити. Обаче якож и пред рекохом во время мира о епископех предваршая взаконена быта. Во время ж обдержания и власти иноязычных, ино имать божественная правила законоположение.
Тоя же главы.
Обретеся повестна книга, яко и выше воспомянухом. Яко от дний Ираклия, греческаго царя, по еже прияти Саракином престол Антиохийский 40 лет сотвори, не пришедшу в онь патриарху возбраняющим Саракином. Но патриархи антиохийскии по приятии бывающий в Констянтине граде живяху и по 40 летех оскудевающи патриархи повелением саракинским от стран сирских християном повелеша бывати патриархом. Еже и бысть. Дондеже паки грецы прията и по еже прияти греком первый патриарх Антиохийский блаженный кир Феодор, игумен монастыря кир — Антониева во арменистем. Тому царь Иван Цымисхий хрусовул дав, и утвердився уставленая, такожде и вся церкви и яже во Антиохии и яже окрест монастыря праведное патриархово сотвори, последуя божественным правилом, и иже его прежде законом, якоже и тии вси сказуют; приложи же царь иже по времени патриархом Антиохийским пребывалище в Констянтине граде обитель пресвятыя Богородицы Наставницы. И сотвори Полиект, святейший патриарх Констянтина града, повелително еже написано еже и служити и руце возлагати по времени патриархом во обителий своих, и в царьствующем же граде и во всех пределех его, идеже аще область наричется и воспоминати именование его; потом же Агапие, патриарх Антиохийский, отрекся. Вместо его поставляется блаженный Иоан. Раскаявжеся реченный Агапие о отречении; блаженный же Иоан убоявся, не пожда приити на престол свой, и от своих митрополит совершитися на святителство, но поспешением отдаст предпочтение Антиохийское. И оттоле уставлено бысть поставлятися от патриарха Констянтиня града. При блаженнем же патриарсе Антиохийстем, кир Петр, Христодул диякон святейшия церкве антиохийския Асии о Стефани той в Констентин град шед, к кувуклисии почтен бысть от святейшаго патриарха кир Михаила и во Антиохию прийде яко почтен быв от вселенскаго патриарха. Кир Петр же не восхоте церкви своея отдати праведная, диакона отгна и писание растерза. Патриарху ж написа с негодованием сказуя праведное, яко несть антиохийский апостолский престол под властию Константина града, но и поставление закопопреступно имать Константинограцкий поспешением Иоанна святейшаго церковное предпочтение отдаст. И восписа Констянтинограцкий, прощения прося, яко чрез волю его от артофилака бысть писание; и патриарх о сем прости диякона. А в 31 главе тоя ж книги написано: Агапит, патриарх Антиохийский, отрекся, в негож место блаженный Иоан избран бысть, и прочая, так, якож выше писано о сем и о дияконе.
Тоя ж книги 30-го слова.
В предисловии о отречении епископстем, яко не повелевают божественная правила творити с писанием, но да истязуется, и аще есть достоин да пребывает; аще ли ни — да извержется.
О бывающих же ныне отречениих чрез правила. Во дни кир Феодосия, патриарха Антиохийскаго, истязано бысть се, в патриархии обретеся сице. Яко обретается согрешив епископ и не хотя яве извержен быти, срам отрясая воображается, яко от произволения отрекся. И от сея вины прият силу обычай и в закон прииде и другий, еже о какове любо иной вине и отречения с писанием творити и убо о просто отречении сице. А о еже предати и наследствовати жив и еще или по смерти се ныне отнюдь не имать слово, но беззаконно есть, и сего ради не творится. Обаче убо речию глаголет святый Мефодий Констянтиня града во иже на Студитяне слове, яко ни бо епископ епископа на своем месте ни жив ни по смерти поставляет, и прочая.
И в нынешний же настоящей 168 год, Февраля в 27 день, по указу великого государя царя и великого князя Алексея Михайловича, всея Великия и Малыя и Белыя Росии самодержца, преосвященный собор о отречении патриаршества святейшаго патриарха Никона правилной выписки слушали, и по выписке правилне разсуждали, бояся кийждо страшнаго суда Божия и помня великаго государя премудрейшее повеление вышеписанное, крепце смотриша да не како неправилне управление сие составитися имать.
Привождаше на среду прошение великаго государя царя и великаго князя Алексея Михайловича, всеа Великия и Малыя и Белыя Росии самодержца, к нему бывшему патриарху Никону чрез боярина своего князя Алексия Никитича Трубецково. Он же бывшей Никон патриарх ни мало внят прошению его, великаго государя, еще же и митрополитов и архиепископа и прочих обретшихся при отречении его патриаршеста молению и такоже не внят. Не поведа же вины отречения своего великому государю, ниже архиереом, ту обретшимся, ниже купно священному собору писания остави, коея ради вины отречеся, но последова желанию своему невежества и грехов вину непщева отречеся, уступи от престола своего, великого государя моление презре и преосвященных архиереов и священных муж множество ктомуже и прочих человек, обретшихся при отречении его, такожде презре.
И уже отречению его год и месяц седмь.
Свидетелие же вси пред освященным собором по Христове евангелской заповеди допрашиваны вси с евангилскою клятвою рекоша, яко скаски свои писаша вправду.
В скасках же их во всех согласно, яко отречеся патриарх Никон патриаршества своего и потом не быти обещася.
К сим же свидетелство прислал великий государь царь и великий князь Алексий Михайлович, всеа Великия и Малыя и Белыя Росии самодержец, с боярином своим с Петром Михайловичем Салтыковым на собор отписку писал к нему великому государю патриарх Никон, пишет Никон патриарх своею рукою сице: «бывшей Никон патриарх».
И преосвященный собор вся сия разсуждая, паче же прилежно правилную выписку прочитающе, возложиша сие на правила святых отец, понеже правила святых отец согласно вси невозбранно повелевают на отрекшагося своей епископии или отшедшаго без богословны вины, вящше шести месяц, епископа вместо его инаго поставляти.
На обороте: 168. Там же по склейкам: Смиренный Питирим, Божиею милостию, митрополит Великаго Новагорода Великих Лук. Смиренный Питирим; Божиею милостию, митрополит Великаго Новагорода и Великих Лук подписал рукою своею.