Святаго собора, иже бысть во дни благочестивѣйшаго, тишайшаго, самодержавнѣйшаго, великаго государя царя и великаго князя Алексіа Михайловича, всеа Великія и Малыя и Бѣлыя Россіи самодержца, въ лѣто отъ Рождества Христова 1667, индикта 5
(Текст приводится по: «Дополненiя къ актамъ историческимъ собранныя и изданныя археографическою коммиссiею. Т.Ѵ спб. тип. Эдуарда Праца. 1855г. Стр. 493-507»)
VIII. Святаго собора, иже бысть во дни благочестивѣйшаго, тишайшаго, самодержавнѣйшаго, великаго государя царя и великаго князя Алексіа Михайловича, всеа Великія и Малыя и Бѣлыя Россіи самодержца, въ лѣто отъ Рождества Христова 1667, индикта 5.
По прочихъ нужднѣйшихъ исправленіяхъ, не утаися отъ святаго собора и cie: еже вдовствующимъ попомъ и діакономъ служити запрещено бысть Россійскими соборы, иже быша въ различныя времена.
Взыскася же нынѣ и Предложися всесвятѣйшимъ патріархомъ, Александрійскому Паисію Божіею милостію папѣ и патріарху и судіи вселенскому, Макарію Божіею милостію патріарху Божія града Антіохіи и всего востока, Іоасафу Божіею милостію патріарху Московскому и всеа Россіи, и преосвященнымъ митрополитомъ, архіепископомъ и еписко-помъ, и всему освященному собору.
Судися же яко аще и кромѣ правилъ положися, еже вдовствующимъ причетникомъ не служити божественныя литургіи, обаче за умноженіе безчинія неискусныхъ причетниковъ, опаства ради, добрѣ повелѣся. Нѣцы бо тогда, за неискуство ученія, презирающе священная правила и попирающе свою совѣсть, недостойніи дерзаху служити. Cie злое Россійстіи пастыріе пресѣцающе, повелѣша вдовствующимъ попомъ и діакономъ не касатися божественнѣй службѣ; презрѣша же разлучити чистыхъ отъ оныхъ невоздержниковъ, ихже всегда подобаетъ отлучати. Извѣстно же сотворися святому собору, яко нынѣ, Божіею благодатію, въ Россійстѣмъ народѣ обрѣтаются священницы и діакони имущіи разумъ божественныхъ Писаній, еще же вѣдущіи и правилныя вины и житіе имущіи чистое.
Всесвятѣйшіи убо патріарси, Александрійскій Паисій Божіею милостію папа и патріархъ и судіа вселенскій, Макарій Божіею милостію патріархъ Божія града Антіохіи и всего востока, Іоасафъ Божіею милостію патріархъ Московскій и всеа Россіи, и преосвященныя митрополиты, архіепископы и епископы, и весь освященный соборъ судиша: отнынѣ аще ключится овдовѣти которому отъ священнаго чина іерею, или діакону, таковымъ повелѣваемъ, аще не зазираетъ имъ совѣсть ихъ о житіи въ нѣчесомъ возбраняющемъ священства, невозбранно да служатъ. Аще же по смерти женъ своихъ кто отъ освя-щенныхъ обличенъ будетъ въ таковыхъ дѣлѣхъ, яже возбраняютъ священнодѣйствія, по сыску, сирѣчь по архіерейскому крѣпкому истязанію и по достовѣрныхъ людей свидѣтелству, аще обрящется повиненъ, тогда да отлучится священнодѣйствія или да извержется по дѣлѣхъ его; понеже бо не жены ради попъ, или діаконъ, и не жены ради умертвія запрещаются священнодѣйствія, но за порокъ невоздержанія или иныхъ безмѣстныхъ дѣлъ, яже запрещаютъ священствовати. Ибо издревле священными правилы неимущіи женъ причетницы не запрещахуся, якоже святая правила свидѣтелствуютъ святыхъ Отецъ.
Вселенскаго Перваго собора правило 3-е: Отрече великій соборъ отнюдь ни епископу, ни пресвитеру, ни діакону, ни всякому сущему причетнику недостойно есть иныя жены въ дому своемъ держати, но токмо матерь, или сестру, или тетку; сія бо три лица всякаго зазора кромѣ суть.
По сему правилу явно есть, яко неимущій женъ презвитери и діякони бяху и служаху.
Являетъ о семѣ и помѣстнаго собора въ Новѣй Кесаріи правило 1-е, изъясняющее оно Вселенскаго 3-го правило, глаголетъ: Оженився презвитеръ да престанетъ отъ службы; пиши (Сначала было въ подл. не пустиши , потомъ поправлено не отступиши.) ея, ни исправивъ себе дерзнеши служити, да будеши проклятъ и пріемлющіи тя отвержени.
По симъ священнымъ правиломъ мы православніи патріарси, Александрійскій Паисій Божіею милостію папа и патріархъ и судіа вселенскій, Макарій Божіею милостію патріархъ Божія града Антіохіи и всего востока, Іоасафъ Божіею милостію патріархъ Московскій и всеа Россіи, соборнѣ повелѣхомъ вдовымъ священникомъ и діакономъ, опасное житіе имущимъ и безъ зазора сущимъ, служити божественную литургію; а житіе имѣти со всякимъ и впредь опасеніемъ и воздержа-ніемъ, и лицъ зазорныхъ въ домѣхъ своихъ отнюдь не имѣти, якоже повелѣваютъ священная правила. Писася въ царствующемъ и преименитомъ градѣ Москвѣ, въ дому пресвятыя Богородицы честнаго и славнаго ея Успенiа, лѣта 7175 года, іюня въ . . день.
Черновой подлинникъ писанъ на пяти листахъ
IX. Во имя Отца, и Сына, и святаго Духа, аминь. Нынѣшняго настоящаго лѣта, 7175 отъ сотворенія свѣта, отъ воплощенія же Бога Слова 1667, марта въ 15 день. По богодохновенному тщанію великого государя царя и великого князя Алексіа Михайловича, всеа Великія и Малыя и Бѣлыя Россіи самодержца, всесвятѣйшіи патріарси, Александрійскій Паисій Божіею милостію папа и патріархъ и судія вселенскій, Макарій Божіею милостію патріархъ Божіяго града Антіохіи и всего востока, Іоасафъ Божіею милостію патріархъ Московскій и всеа Россіи, снидошася купно съ преосвященными митрополиты, со архіепископы и епископы, и со всѣмъ освященнымъ соборомъ. Къ нимъ же возгласи великій государь царь и великій князь Алексій Михайловичь, всеа Великія и Малыя и Бѣлыя Россіи самодержецъ, о преждебывшемъ соборѣ во 129-мъ году, при святѣйшемъ Филаретѣ Никитичѣ патріархѣ Московскомъ и всеа Россіи, о крещеніи отъ Римскія вѣры приходящихъ къ православнѣй вѣрѣ святыя Восточныя церкве, правилно ли повелѣся тѣхъ крестити? Всесвятѣйшіи же патріарси, преосвященніи митрополиты, архіепископы и епископы, и весь освященный соборъ, услышавше о семъ богопріятное желаніе великаго государя царя и великаго князя Алексіа Михайловича, всеа Великія и Малыя и Бѣлыя Россіи самодержца, повелѣша изъ соборнаго изложенія оного, еже бысть при бытіи святѣйшаго патріарха Филарета Никитича Московскаго и всеа Россіи, и изъ правилъ святыхъ Апостолъ и святыхъ Отецъ и изъ прочихъ божественныхъ писаній выписати, для свидѣтельства, аще согласно съ правилы и съ божественными писаніи оного бывшаго собора списатели выписки предложиша о томъ Латинскомъ крещеніи, или что несогласно.
Выписано изъ правилъ и изъ соборнаго онаго изложенія:
Въ соборномъ изложеніи на листу 219 напечатано: Говорилъ Іона митрополитъ Крутицкій, яко писано въ 6-мъ соборѣ, что Латинъ не крестити, токмо мѵромъ помазывати: и ему Іонѣ отвѣтъ. Въ томъ правилѣ 95 не то написано; мы убо то правило обрѣтше чтохомъ, и въ томъ правилѣ въ девятьдесятъпятомъ написано: «Яко Павликіаны, иже отъ Павла Самосатскаго суть, и Евноміаны, и Монтанити, иже суть и Монтане, и Савеліаны, и Манихеи, и Іуалентіаны, тіи же и Валентина, и Маркіонити, тіи же и Маркіане, и сущіи отъ подобныхъ имъ ересей приходящій къ правовѣрнѣй вѣрѣ, яко Еллины пріемлемъ сихъ; а Еллинъ подобаетъ совершенно крестити».
И то напечатано изъ толкованія того правила, которыхъ ересей въ сущемъ правилѣ не писано, но писано отъ инѣхъ правилъ о тѣхъ, которыхъ и крестити подобаетъ; а писано въ томъ сущемъ правилѣ 6-го Вселенскаго собора 95-мъ сице: «обращающихся отъ еретикъ сице пріимаемъ, Аріаны, Македоніаны и Наватіаны же, иже и чистіи именуются, Несторіаны и Четыренадесятники, иже суть Средницы Наполинаріаны, и Евтихіаны, и Северіаны, и иже отъ подобныхъ имъ ересей проклинающыя вся ереси и съ ними и свою, помазуемъ святымъ мѵромъ темена, очи, ноздри, уста, уши, и знаменающе я глаголемъ: «печать дара святаго Духа.» И съ симъ правиломъ въ соборномъ изложеніи написанъ отвѣтъ вышереченный несогласенъ.
Въ томъ же изложеніи на листу 220-мъ напечатано свидѣтельства, святыхъ Апостолъ правилы 46 и 50; и въ правилѣхъ святыхъ Апостолъ 46-мъ писано: «крещеніе и жертву еретическую пріемъ, святитель не священъ;» и 50-мъ: «аще который епископъ, или пресвитеръ, не крещаетъ въ три погруженія единѣмъ глашеніемъ, но во едино погруженіе въ смерть Господню даемо, да извержется таковый: не рече бо Господь: въ смерть мою крестите, но шедше научите вся языки, крестяще ихъ во имя Отца, и Сына, и святаго Духа.» По симъ Апостольскимъ правиломъ 46 и 50-му поразумѣти подобаетъ (Противъ нижеслѣдующей выписки на полѣ отмѣчено: Василіа Велик. толкованіе.): глаголютъ бо оныя правила крещеніе и жертву еретическу и крещеніе во едино, погруженіе, явно есть о тѣхъ еретикахъ глаголютъ, иже Божія вѣры отнюдъ отчюждишася, ихъже и послѣдующія правила повелѣваютъ крестити, а не о тѣхъ, иже крещаются во имя Отца и Сына и святаго Духа, противятжеся иными нѣкими расколы или ересми. И та Апостольская правила списатель не прилично выписалъ на Латинское крещеніе; глаголютъ бо оная правила: «аще кто не крещаетъ въ три погруженія, но во едино въ смерть Господню даемое, да извержется.» Латини же крестятъ не во едино погруженіе, и ниже въ смерть Господню, но трижды обливающе крестятъ во имя Отца, и Сына, и святаго Духа, якоже предложенный чинъ Римскаго крещенія святому собору свидѣтельствуетъ. Удобнѣйши убо было бы оному списателю предложити о обливаніи, пріимется ли обливаніе за погруженіе; и оный списатель не написа свидѣтельства винующа обливаніе.
Въ томъ же изложеніи на листу 220-мъ Перваго селенскаго собора правило 19-е на указѣ о Павликіанѣхъ. И то правило Вселенскаго собора 19-е Латинскому крещенію не прилично же: понеже Павликіане о Христѣ Бозѣ нашемъ неправо мудрствуютъ, проста человѣка глаголютъ.
На томъ же листу 220-мъ на оборотѣ (За симъ въ подл. прибавлено: печатано.): «Мельхиседикіане, и Жидове, и Армене въ субботу постятся.» И то списатель выписалъ неправо же: о Жидовскомъ постѣ обличается законы Жидовскими, яко у нихъ субботу празднуютъ, а не постятся; о Арменѣхъ же обличается отъ 6-го Вселенскаго собора пра-вила 56, яко и въ Великій постъ Армени по вся субботы сыръ и яйца ядятъ. То правило и самъ списатель написалъ на листу 221-мъ, нарекъ то 6-го собора 56-е правило Апостольскимъ правиломъ; Апостольское же правило 56-е не о томъ глаголетъ. Той же списатель писалъ на листу 221-мъ (Па полѣ приписано скорописью: Іюдее въ суботу празнуютъ.), а выше на листу 220-мъ: «Жидове въ субботу постятся;» а на листу же выше 221-мъ писалъ: «Римляне съ Жиды, и съ Мелхиседекіаны, и Армяны равно въ субботу постятся.» И то списатель неправо же написалъ. На томъ же листу на оборотѣ написалъ у Римлянъ Монтанову ересь, и аще у Римлянъ обрѣтается Монтанова ересь и подобная той, иже еретиковъ покрещевати правила повелѣваютъ, подобаетъ крестити и Римлянъ; а по досмотру чина крещенія Ла-тинскаго на соборѣ, у Римлянъ Монтановы ереси нѣсть, понеже крещаютъ во имя Отца и Сына и святаго Духа, токмо обливаютъ трижды, а не погружаютъ.
И о обливаніи списатель бывшему собору при святѣйшемъ Филаретѣ, патріарсѣ свидѣтельства никакова не предложилъ.
Того же соборнаго изложенія на листѣхъ 223, 224, 225, 226, 227, 228-мъ, списатель подобающихъ покрещевати уподобляетъ Латиномъ Монтанистовъ, глаголемыхъ Фругъ и Савелліанъ, неправѣ о святѣй Троицѣ мудрствующихъ; ихъже не подобаетъ сравняти, понеже вь чину Римскаго крещенія написано: во имя Отца, и Сына, и святаго Духа крещаются.
На листу 228 на оборотѣ написано: Аріане крестятся во едино погруженіе, не глаголютъ во имя Отца и Сына и святаго Духа, но гря-дущаго по Предтечи Іоаннѣ, сирѣчь во Христа Іисуса. И то списатель написалъ не право, не разсмотривъ правилъ: аще бы тако крещеніе Аріанское въ та времена было, а не во имя Отца и Сына и святаго Духа, не бы божественная правила повелѣвали ихъ пріимати и не покрещевати, но токмо мѵромъ помазывати и ересь свою проклинати; якоже свидѣтельствуетъ 6-го Вселенскаго собора правило 95-е, писано выше сего на 3-мъ листу.
На листу 201-мъ на оборотѣ, Вселенскаго собора 1-го правило 19 на указѣ Павликіанъ уподобляетъ Латиномъ. Списатель и cie выписалъ неправо же; писано о семъ выше сего на 4-мъ листу на оборотѣ.
Ересь главнѣйшая у Латинъ отступленіе Восточныя церкве о исхожденіи святаго Духа, яко отъ Отца и отъ Сына исходитъ Духъ свя-тый мудрствуютъ; и отъ тоя ереси Латинскія, яже есть о исхожденіи святаго Духа, тяжчайшая есть Аріанская и Македоніанская ересь. Аріане бо Сына Божія не единосущна Отцу и святому Духу исповѣдаютъ, но зданіе и тварь глаголютъ; Македоняне же святаго Духа отъ Отца и Сына отчюждаютъ, раба исповѣдуютъ быти. Обаче правило 7-е втораго Вселенскаго собора и 6-го Вселенскаго собора 95-е не повелѣваютъ ихъ крестити, но токмо мѵромъ помазывати по чину; колми паче Латинъ, меншее преступленіе имущихъ, не подобаетъ крестити.
Правило 7-е Втораго собора сице глаголетъ: Четыредесятницы, иже и Средницы глаголются, и Аріане, и Македоніане, и Наватіане, и Саватіане, и Аполинарити писаніе вдавше пріятни, помазующе токмо вся чювства; 6-го же Вселенскаго собора правило 95 выше сего писано на 3-мъ листу. И сихъ ради правилъ и Латинъ не подобаетъ крестити, понеже крещаются во имя Отца и Сына и святаго Духа, а не яко Монтанисти, и Пепузане, и Фриги, и прочіи подобніи имъ, суще совер-шеніи еретицы.
Василія Великаго правило 1-е: еретикъ есть иже вѣрою чюждь, а иже по нѣкоему незнаему вопрошенію, той есть расколникъ.
Собирающій же сихъ или о инѣхъ непокориви, сіи суть подъцерковницы, иже отлучившеся сами отъ соборныя церкве и иную создавше, особно собираются; а еже отъ еретика крещеніе не пріятно, отъ расколника же и отъ подъцерковника пріятно.
Правило Великаго Василіа 1-е: отъ еретика убо крещеніе не пріятно, отъ расколника же и отъ подцерковника пріятно.
Правило Тимоѳеа Пресвитера, на листу въ Кормчей 634-мъ, Аріанъ не повелѣваетъ крестити, но точію мѵромъ помазывати.
Преподобнаго отца нашего Iосифа Волоцкаго въ книзѣ на Новгородскія еретики, во главѣ 15-й, писано: иже оть еретикъ приходящихъ и кающихся, а вѣроющихъ и крестившихся во имя Отца и Сына и святого Духа, не повѣлено паки крестити, но абiе Таинъ сподобляти по отверженiю своея ереси.
Кѵръ Тимоѳея, святѣйшаго архiепископа Александрiйскаго, отвѣтъ правилный на вопросъ сице глаголющій: Вопросъ. Почто обращающыяся еретики къ соборнѣй церкви не покрещаемъ? Отвѣтъ. Аще бы cie было (еже покрещевати), не бы человѣкъ скоро обращался отъ ереси, стыдяся покрещенiя; обаче и возложеніемъ руку презвитерскую и молитвою вѣсть приходити Духъ Святый, якоже свидѣтельствуютъ Дѣянія Святыхъ Апостолъ, зач. 18: тогда, рече, возложиша руцѣ на ня, и пріяша Духъ святъ.
Еще къ симъ предложится на разсужденіе о отвергшихся Христа волею и пожершыхъ идоломъ, нетокмо самихъ погибшихъ, но и иныя понудившихъ погибнути съ собою; якоже Агкирскаго собора въ правилѣ девятомъ глаголетъ на листѣ 44 въ Кормчей: Иже нетокмо самъ своею волею пожеръ, но и иныя на то понудивъ, десять лѣтъ да припадаетъ. Толкованіе. Аще кто своею волею пожеръ идоломъ, и самъ себе погубивъ, и другія понудивъ и вринувъ въ погибель, аще обратится, три лѣта да пребудетъ съ послушающими, и другихъ шесть лѣтъ да сотворитъ съ припадающими, лѣто же едино да стоитъ съ вѣрными, пріобщаяся съ ними молитвъ даже и до конца божественныя службы; и тако времене десять лѣтъ прешедшу, да пріиметъ совершеніе и божественныхъ святынь до сподобится. Аще убо и инако житіе его испытаемо, не упразднити его божественнаго причащенія.
Аще же кто негодовати начнетъ за соборное изложеніе оно, еже бысть при святѣйшемъ патріарсѣ Филаретѣ Никитичѣ Московскомъ и всеа Россіи, ревность имѣя еже бы не разрушити его: о семъ таковый и да не негодуетъ и да не сумнится, но да вѣсть, яко и во древняя времена соборъ собора исправляше, не негодующе о первомъ, но на лучшее церкве смотряюще исправиша послѣди. Якоже видѣти есть въ Новой Кесаріи бывшій соборъ святыхъ Отецъ, въ немъ же правило 15-е по 7-ми діаконовъ имѣти повелѣваетъ, аще и великій градъ есть; святіи же Отцы 6-го Вселенскаго собора зазрѣша о семъ Неокесарійскому собору, яко недобрѣ разумѣша, еже въ книгахъ Дѣяній Апостольскихъ о седми діаконъ лежащаго словесе, не о служащихъ бо тогда Божественнымъ Тайнамъ мужехъ бяше попеченіе святымъ Апостоломъ, но о служащихъ въ трапезахъ, имъже бѣ порученно строеніе общія потребы; тогда собравшеся имѣти койждо церкви узакониша противо имѣнію сходящемуся къ ней. Тожде рещи и о другихъ многихъ правилѣхъ, ихъже паки Вселенстіи собори праздности предаша; [якоже при Ки-пріанѣ бывшемъ соборѣ видѣти есть, егоже началникъ великій той Кипріанъ бѣ, иже всякаго еретика и расколника покрещевати повелѣваше, и крестити на три чины расположивъ]. Но убо и въ великій четвертокъ Карѳагенскій соборъ узаконоположи, повнегда вечеряти святымъ Тайнамъ Христовымъ причащатися, по подобію Господни оныя вечери; Вселенскій же 6-й соборъ разрѣши оно правило, не ядшимъ повелѣ святителемъ въ той день безскверную службу совершати, и людемъ такожде не ядшимъ тоя причащатися. И что много глаголати? И Апостольская узаконенія и правила святіи Отцы послѣди исправляху на лучшая: якоже видѣти въ 6-мъ Вселенскомъ соборѣ въ 12-мъ правилѣ, сице глаголющемъ: аще и реченно есть [во Апостольскихъ правилѣхъ] не пустити женѣ епископомъ, но на лучшее поспѣшеніе промышляюще, поставляемому епископу уже кътому не жити съ женою заповѣдаемъ; и многа ина таковая обрѣсти имать кто отъ прежнихъ убо святыхъ соборовъ изложенная, отъ послѣднихъ безъ зазора исправленая; а не зазираху зираху и не поношаху прежнимъ въ неисправленіи. И нынѣ убого исправленіи прежде бывшаго собора при святѣйшемъ Филаретѣ, патріархѣ никтоже да сумнится, или зазритъ; лѣпо бо по преждереченныхъ образѣхъ.
Аще же кто упорствомъ восхощетъ покрещевати Латины, памятствовати подобаетъ правило святыхъ Апостолъ 47-е, глаголющее сице: второе крещая крещеннаго истиннымъ крещеніемъ, и не покрещеваяй оскверненаго отъ зловѣрныхъ, таковый святитель неосвященъ. И правило 55 писано выше на оборотѣ 3-го листа: то бо правило повелѣваетъ покрещевати во едино погруженіе крестящихся. Того же собора святыхъ Апостолъ 49-е: аще который епископъ, или пресвитеръ, по Господню завѣщанію не креститъ во имя Отца и Сына и святаго Духа, но въ три безначалны, или въ три Сыны, или въ три Утѣшители крещаетъ, да будетъ изверженъ.
Таковыхъ, иже Апостолская сія правила и послѣдующая тѣмъ вышеписанная Отческая правила повелѣваютъ крестити, тѣхъ и кре-стити подобаетъ; а иже крестившихся во имя Отца и Сына и святаго Духа, таковыхъ въ божественныхъ правилѣхъ святыхъ Апостолъ и святыхъ Отецъ не обрѣтеся еже бы ихъ паки крестити.
О Латинскомъ убо крещеніи, еже дѣйствуется во имя Отца и Сына и святаго Духа трикратным обливаніемъ, всесвятѣйшіи патріарси кѵръ Паисій папа и патріархъ Александрійскій и судія вселенскій, и кѵръ Макарій патріархъ Божіяго града великія Антіохіи и всего востока, и кѵръ Іоасафъ патріархъ Московскій и всея Русіи, и преосвященіи ми-трополиты и архіепископи и епископи, и весь освященный соборъ, слушавше выписи сея дѣло разсудиша, яко не подобаетъ приходящихъ отъ Латинъ ко святѣй апостолстѣй Восточнѣй церквѣ покрещевати. А во утверженіе сего узаконенія, предложиша святѣйшіи вселенстіи патріархи, кѵръ Паисій папа и патріархъ великаго града Александріи и судія вселенныя и кѵръ Макарій патріархъ Божія града великія Антіохіи и всего востока, на соборѣ книгу древнюю Греческую, въ нейже писано: яко въ лѣто 6992 бысть, соборъ въ Константинополи, пъ пречестнѣмъ храмѣ пресвятые Богородицы зовомыя Памма каристъ, отъ четырехъ вселенскихъ святѣйшихъ и блаженнѣйшихъ патріарховъ, кѵръ Симеона Константинополскаго, и кѵръ Григорія папы и патріарха Александрійскаго, и кѵръ Дороѳеа Антіохійскаго, и кѵръ Іоакима Іерусалимскаго, на превращеніе и упражненіе иже во Флорентіи злѣ бывшаго собора. Сей святый соборъ повелѣ, яко аще кто отъ Латинъ возвратится ко православнѣй каѳоличестѣй Восточнѣй церквѣ, помазывати ихъ святымъ мѵромъ, а не прекрещевати. Изобрази же и послѣдованіе сей святый соборъ, како пріимати ихъ и вопрошати и како проклинати имъ Латинскіе ереси, и посемъ помазовати святымъ мѵромъ и молитвовати надъ ними; взимати же и рукописаніе отъ нихъ во святую великую церковь. Подобнѣ повелѣваетъ премудрѣйшiй и святѣйшій кѵръ Марко Ефесскій митрополитъ во окружнѣй своей епистолія , еяже начало сице: «иже по всей земли и островѣхъ обрѣтающіися христіане:» въ нейже по мнозѣхъ рѣчехъ и сія глаголетъ: яко отъ Латинниковъ приходящихъ къ православію, яко Аріановъ, и Македоніанъ, и Савватіанъ, и Наватіанъ, пріемлемъ подающихъ писаніе и проклинающихъ всякую ересь, не мудрствующую якоже мудрствуетъ святая Восточная церковь; и по седмому правилу Втораго собора печатаемъ, сіирѣчь помазуемъ ихъ святымъ мѵромъ чело, очеса и прочая по уставу, глаголюще: печать дара святаго Духа, аминь. Се тако пишетъ и повелѣваетъ святѣйшій кѵръ Марко Ефесскій. Емуже согласующе и святѣйшіи патріарси, со всѣмъ освященнымъ соборомъ, сицевое сотвориша законоположніе: Паисій Божіею милостію папа и патрiархъ Александрѣйскiй и судiя вселенскiй, Макарий Божiею милостiю патрiархъ Антiохiйскiй и всего востока, Iоасафъ Божiею милостiю патрiархъ Московскiй и всеа Русiи, и весь освященый соборъ, днесь прочитавше оного собора дѣянiя выписку бывшаго при свтѣйшем Филаретѣ Никитичѣ патрiарсѣ Московскомъ и всеа Русiи, обрѣтохомъ, яко не пра-ведно списателiе предложиша собору оному указанія правилвая, и не суть прилична на покрещенія Латинъ; еще же во ономъ соборномъ дѣяніи обрѣтохомъ и правила правиломъ не сличны, указанія же ихъ, сирѣчь приводы нимало къ правиломъ согласны, якоже то самое соборное являетъ дѣяніе, изъ негоже разнство правилъ и указаніи писася выше сего. И согласно судихомъ вси, яко неподобно Латинъ покрещевати, но точію по проклинанiи своихъ имъ ересей и по исповѣданіи согрѣшеній и по даяніи рукописанія помазовати ихъ святымъ и великимъ мѵромъ, и сподобляти Святыхъ и Пречистыхъ Таинъ, и тако прiобщати святѣй соборнѣй апостольстѣй Восточнѣй церквѣ, по священнымъ правиломъ, о нихъже впреди сего пространнѣе речеся, не покрещевающе отъ Латинъ приходящихъ; а негодующихъ же о исправленіи собора; бывшаго при святѣйшемъ Филаретѣ Никитичѣ патріарсѣ Московскомъ и всеа Русіи,
выше сего написася. Тако мы соборнѣ священными правилы достовѣрно свидѣтельствовахомъ и согласно судихомъ (И согласно судихомъ приписано сверху строки) вси, отьднесь приходящихъ отъ Латинъ къ нашей православнѣй христіянстѣй вѣрѣ святыя Восточныя церкви не покрещевати, но по чину и свидѣтельству вышеписанному пріимати, тако единомудрено утвердихомъ и своими руками подписахомъ. Лѣта 7175 отъ созданія міра, отъ воплощенія же Бога Слова 1667, мѣсяца іуніа въ … день.
Черновой подлинникъ писанъ въ листѣ, на двѣнадцати листахъ
X. Блаженнѣйшаго и всесвятѣйшаго кѵръ Паисіа папы и патріарха великого града Але-ксандріи и судіи вселеннѣй, блаженнѣйшаго и всесвятѣйшаго кѵръ Макаріа патріарха Божіа града великiя Антіохiи и всего востока толкованіе о аллилуіи, и о знаменіи честнаго и жи-вотворящаго креста, сирѣчь о сложеніи перстовъ, и заповѣдь о святом Символѣ и о Іисусовѣ молитвѣ и о прочихъ.
Святая Христова Восточная и апостолская церковь отъ святыхъ Апостоловъ и святыхъ богоносныхъ Отцевъ и вселенскихъ учителей пріятъ сію Ангелскую пѣснь, сирѣчь аллилуіа, въ божественомъ пѣніи во учиненыхъ мѣстехъ глаголати: «аллилуіа, аллилуіа, аллилуіа, сла-ва, тебѣ Боже» сице 3-жды, якоже видится и писано во многихъ Греческихъ и Словено- російскихъ древнихъ рукописныхъ харатейныхъ книгахъ; и то cie являетъ и cie разумѣетъ православно-святая Восточная и апостолская церковь: аллилуіа Отцу, аллилуіа Сыну, аллилуіа святому Духу, таже «слава тебѣ Боже,» или хвала Отцу, хвала Сыну, хвала святому Духу. Глаголюще сице аллилуіа 3-жды, таже «слава тебе Боже,» являемъ и исповѣдуемъ, яко въ Троицѣ и во Единицѣ Богъ, сирѣчь 3-жды аллилуіа ради тріѵпостасіа исповѣданія, и еже приречемъ: «слава тебѣ Боже,» являемъ и исповѣдуемъ, яко Троица единъ Богъ есть, а не три бози; якоже поетъ святая церковь: «святый Боже, святый крѣпкій, святый безсмертный, помилуй насъ.» И въ сей Ангельской пѣсни такожде разумѣемъ, якоже и во аллилуіи, въ божествѣ Троицу и Единицу: святый Боже Отецъ, святыя крѣпкій Сынъ, святый безсмертный Духъ святый, таже «помилуй насъ,» а не «помилуйте насъ;» се еже со Трисвятымъ исповѣдуемъ въ трехъ ѵпостасѣхъ быти Бога, и еже «помилуй насъ» едино божество; единъ бо Богъ Троица, а не три. И Херувимская пѣснь: «святъ, святъ, святъ Господь Саваоѳъ», подобнѣ являетъ, якоже аллилуіа и святый Боже, 3-ДЫ «святъ,» ради тріѵпостасного божества; и Господь Саваоѳъ ради единаго существа: святъ Отецъ, святъ Сынъ, святъ Духъ святый, таже Господь Саваоѳъ, сирѣчь Господь силъ. По Діонисію Ареопагиту се убо единъ Господь силъ святая Троица, а не три господы: сице и во «аллилуіа» 3-жды ради Троицы и «слава тебѣ Боже» ради Единицы, зане Богъ въ Троицѣ и во Единицѣ славословится и вѣруется и исповѣдуется.
Сице держитъ и мудрствуетъ святая Восточная апостолская церковь, якоже пріятъ свыше и изъначала писаное и не писаное преданіе отъ святыхъ Апостоловъ и отъ богоносныхъ Отцевъ и Вселенскихъ соборовъ и прочихъ. А еже глаголютъ нѣцыи аллилуіа 2-жды, таже «слава тебѣ Боже,» никакова основанія въ томъ имѣютъ, толкуютъ убо, яко знаменуетъ аллилуіа «слава тебѣ Боже» 2-жды аллилуіа, таже «слава тебѣ Боже» являетъ по ихъ 3-жды слава тебѣ Боже; се трижды «слава тебѣ Боже» являетъ токмо Троицу, а Единицу ни; се убо погрѣшаютъ зѣло, зане невѣдѣніемъ исповѣдаютъ токмо Троицу просто, а Единицу ни. Но святая Восточная и апостолская церковь православно мудрствуетъ и исповѣдуетъ въ божествѣ Троицу и Единицу; сего ради и православно поетъ во учиненыхъ мѣстѣхъ «аллилуіа» 3-жды ради Троицы, и «слава тебѣ Боже» ради Единицы, и «святый Боже, святый крѣпкій, святый безсмертный, помилуй насъ», и «святъ, святъ, святъ Господь Саваоѳъ» тожде трисвятое ради Троицы, «помилуй насъ» и «Господь Саваоѳъ» ради Единицы, якоже выше рекохомъ. Се есть православное мудрованіе, а яже писано въ Ефросиновѣ Житіи, она вся суть суемудріе, и аще кто будетъ прочитати то Житіе по Бозѣ со вниманіемъ, разумѣти будетъ. И еже глаголютъ, яко о сей «аллилуіи» иде во Царьградѣ и слыша отъ патріарха и въ соборной велицѣй Церкви глаголющія «аллилуiа» 2-жды, о томъ мнимъ, яка не иде во Царьградъ, зане времена тогда не такова быша: владѣша бо тогда Турки Болгаріею и Сербы и всѣмъ Западомъ до Дуная и до Чернаго моря, и ратоваша тогда на христіаны великими и лютыми рагми; аще бо и иде во Царьградъ, якоже глаголютъ лѣтописцы, обрѣтается, яко не въ то время бѣ Iосиф патріархъ и Евфросинъ преподобный, но въ различныхъ временѣхъ, а аще и приходилъ при Iосифѣ патріархѣ, и тотъ бѣ латиномудрый, иже бѣ на осмомъ соборѣ во Флорентіи. И паки единаго человѣка свидѣтелство не пріемлется, по божественному Писанію, аще и ангелъ съ небесъ будетъ. И паки вяща разумѣется истина въ списателевѣ видѣніи, иже глаголетъ, яко видѣ Богородицу и Архангела и бесѣдова съ ними о «аллилуіи,» и негли яко рече ему Богородица таковая словеса и толкованія о аллилуіи, яже ниже слышати кому подобаетъ таковая хула, и тамо будетъ ужасатися читатель безумія списателева Евфросинова Житія; и cie смущеніе, еже глаголати аллилуіа 2-жды, таже «слава тебѣ Боже,» не отъ Евфросина стало, но отъ списателя Евфросинова Житія, діяволскимъ навѣтомъ; а Евфросинъ въ послѣднемъ поученіи своемъ при смерти, якоже слыша-хомъ и разумѣхомъ, о аллилуіи ничесоже завѣща братіи монастыря своего, ниже писа что о томъ въ тестаментѣ (На полѣ противъ cегo написано: въ завѣщаніи.) своемъ, токмо солгано на преподобнаго Евфросина отъ списателя Житія его. А еже глаголютъ на преподобнаго Максима Грека, яко и онъ мудрствованіе 2-жды глаголати аллилуіа, и приводятъ во свидѣтелство святаго Игнатіа Богоносца, яко отъ ангеловъ слышати пѣти 2-жды аллилуіа, и въ томъ лгутъ на святаго Игнатіа и на Максима Грека: зане святому Игнатію явишася ангели о божественномъ псалмопѣніи, сирѣчь о антиѳонѣхъ, а не о аллилуіи; и въ семъ не согласуется самое писанiе, еже называютъ Маноимово, и въ томъ разумѣется подлинно, яко то сложенiе слова не Максимово есть, токмо лгаша нѣцiи суемудріи на его имя, ибо Маноимъ премудръ бяше и не моглъ бы сице противныхъ писати.
О знаменіи честнаго креста, сирѣчь о сложеніи перстовъ. Такожде и знаменіе честнаго и животворящаго креста отъ святыхъ славныхъ и всехвальныхъ Апостоловъ, и отъ святаго священномученика Игнатіа Богоносца, третіаго патріарха Антіохійскаго и наслѣдника святыхъ Апостоловъ, и отъ Вселенскихъ учителей, свыше и изъ начала, пріяхомъ право-славно знаменати себе знаменіемъ честнаго креста треми первыми персты десные руки, совокупивши я, во имя Отца и Сына и святаго Духа, не писаннымъ преданіемъ, якоже сви-дѣтельствуетъ и святый Василій Великій въ словѣ 27-мъ иже ко святому Амфилохiю епи-скопу Иконійскому. Обаче егда согбаемъ и совокупляемъ три первыя персты десныя руки, знаменуемъ, яко вѣруемъ и исповѣдуемъ въ божествѣ Троицу и Единицу, сирѣчь, яко святая Троица единъ Богъ есть тріѵпостасный и единосущный. Сего ради сими треми первыми персты предаша намъ святіи Апостоли и богоносніи Отцы творити на себѣ знаменіе животворящаго креста, совокупивше я, во имя святыя единосущныя и нераздѣлныя Троицы. А въ сихъ тріехъ перстахъ не яко хощетъ показати божество, якоже блядословиша нѣцыи, не буди, но токмо число покажемъ Троицы и Единицы, три перста за Троицу, совокупленіе же перстовъ ради Единицы, сирѣчь яко Богъ въ Троицы и во Единицѣ. Сице вѣруемъ и исповѣдуемъ, а не инако, не яко нѣцыи суемудріи писаша и научиша, а сказаша все таинство Божества и Человѣчества въ перстахъ быти и являтися пребеззаконно и хулно Троичному таинству въ неравныхъ перстахъ. Глаголаша тѣ суемудріи, яко два перста вторый указателный и третій средній Божество и Человѣчество знаменуютъ, и три перста первый, четвертый и послѣдній меншій наклонити и совокупити подъ двѣма персты и именоваша святую Троицу, и глаголаша, яко тѣ три неравныя и разныя персты есть таинство святыя Троицы. Всѣмъ убо явленно есть, яко исповѣдаше во святѣй Троицѣ неравенство, яко Аріане, и Несторіане, и Духоборцы, и Аполинаряне и протчіи проклятіи еретицы: зане они сице исповѣдаше несравненіе и раздѣленіе во святѣй Троицѣ, Отца болша назваша а Сына менша и Духа святаго еще менша и яко раба, такожде и тѣ три разныя и неравныя персты являютъ якоже мудрствоваша вышереченіи проклятіи еретицы. А мы православно три первыя персты, якоже стоятъ по ряду первый, вторый и третій, совокупляемъ во имя Отца и Сына и святаго Духа и знаменаемся знаменіемъ честнаго и животворящаго креста Христова; якоже пріяхомъ отъ святыхъ Апостоловъ и богоносныхъ Отцевъ, сице и исповѣдуемъ, и сице держитъ крѣпко и непоколебимо святая Восточная и апостольская церковь и будетъ держати вѣчно и неподвижно. И тако подобаетъ всякому православному христіанину, послѣдующему святѣй Восточнѣй и апостолстѣй церкви, держати в мудрствовати, якоже предаша святіи Апостоли и богоносніи Отци, а не инако. А еже глаголютъ на святаго Мелетія и на Ѳеодорита, яко писаша и повелѣша они якоже знаменатися тако и благословити іерею: и въ томъ на святаго Мелетія и на Ѳеодорита солгано; зане святый Мелетій три первыя персты показа ради трехъ ѵпостасій святыя Троицы, и паки тыя три персты совокупи ради Единаго божества, и бысть знаменіе, а не инако бысть показаніе перстовъ отъ святаго Мелетія. А Ѳеодоритъ о томъ ничтоже писа; зане велико истязаніе о томъ было во Святѣй горѣ Аѳонстѣй, въ лѣто 7156, подобнѣ якоже и въ царствующемъ великомъ градѣ Москвѣ бысть крѣпкое истязаніе отъ преосвященныхъ Великороссійскихъ митрополитовъ, архіепископовъ и епископовъ, во святомъ Духѣ собравшихся въ лѣто 7174, И не обрѣтеся въ Ѳеодоритовѣ книзѣ таковое писаніе, но солгано на него Ѳеодорита отъ нѣкихъ суемудрыхъ и сокровенныхъ еретиковъ; такожде и о святомъ Символѣ бысть взысканіе, и обрѣтоша въ древнихъ Славенскихъ харатейныхъ книгахъ, а писано якоже и въ Греческихъ и како напечатано есть въ новоисправленыхъ книгахъ.
Сего убо ради повелѣваемъ мы православніи патріарси со всѣмъ освященнымъ соборомъ, съ великою клятвою, еже святый Символъ пріимати, и глаголати безъ прилога, якоже святіи и богоносніи Отцы въ Первомъ и во Второмъ вселенскимъ соборѣхъ написаша Гречески, якоже нынѣ исправлено и печатается Славенски; и въ божественномъ церковномъ пѣніи троити аллилуіа, сирѣчь глаголати въ подобное время сице: аллилуіа, аллилуіа, аллилуіа, слава тебѣ Боже; и знаменатися знаменіемъ честнаго и животворящаго креста треми первыми персты десныя руки, совокупивши я во имя Отца и Сына и святаго Духа, по древнему преданію святыхъ Апостоловъ и святыхъ Отцевъ, якоже выше писано; а Іисусову молитву, обще въ церквахъ и въ домѣхъ глаголати: «Господи Іисусе Христе Боже нашъ, помилуй насъ, аминь», по древнему преданію святыхъ и богоносныхъ Отцевъ, якоже видится и писано во многихъ древнихъ Греческихъ и Славенороссійскихъ харатейныхъ книгахъ. А кто хощетъ глаголати упрямства ради токмо едино: «Господи Іисусе Христе Сыне Божій», а «Господи Іисусе Христе Бо-же нашъ», глаголати отвращается, мнится, яко мудрствуетъ и исповѣдуетъ Христа, яко и Арій, точію Сына Божія быти по благодати, а не Бога истинна единосущнаго Отцу. И въ томъ внимайте и разсудите; и уразумѣете, кая молитва естъ вящше прилична и болши честь проноситъ Христу; явственно есть, яко сія молитва: «Господи Іисусе Христе Боже нашъ, помилуй насъ» есть вящше прилична и болши Христу приносится честь, зане сею молитвою исповѣдуемъ Христа Сына Божія быти и Бога истинна: глаголюще «Господи Іисусе Христе», то Сына Божіа исповѣдуемъ, зане единъ Іисусъ Христосъ есть Сынъ Божій, а не инъ, а глаголюще «Боже нашъ, помилуй насъ», тѣмъ исповѣдуемъ, яко Христосъ есть истинный Богъ нашъ, яко и Отецъ и Духъ святый; сего ради достоитъ вамъ глаголати сію молитву: «Господи Іисусе Христе Боже нашъ, помилуй насъ.» Но и сіа молитва «Господи Іисусе Христе Сыне Божій, помилуй насъ» не прекословящымъ свободна есть ко читанію; противящыися паки сея молитвы «Господи Іисусе Христе Боже нашъ» узаконенію, да увѣщаются, еже научитися чести ю благоговѣйно; яко Отцы святыми преданную. Cie есть наше толкованіе и заповѣдь о святомъ Символѣ, о аллилуіи и о знаменіи честнаго и животворящаго креста, о сложеніи перстовъ и о Іисусовѣ молитвѣ. Аще же кто будетъ противлятися намъ и всему освященному собору, Богу противляется и уподобляетъ себе прежнимъ проклятымъ еретикомъ, и сего ради наслѣдити имать, якоже и тіи еретицы, анаѳему и проклятіе святыхъ богоносныхъ Отцевъ святыхъ Седми вселенскихъ соборовъ, и въ страшный судъ о семъ осужденъ будетъ отъ Господа Бога и Спаса нашего Іисуса Христа во второмъ его и страшномъ пришествіи, емуже слава, честь и поклоненіе со безначалнымъ его Отцемъ и съ пресвятымъ и благимъ и животворящимъ его Духомъ, нынѣ и присно и во вѣки вѣковъ, аминь.
Обрѣтаются въ древнихъ Греческихъ рукописныхъ и печатныхъ книгахъ и сія толкованія о аллилуіи: святаго Германа патріарха Константинополскаго толкованіе: «алл» Отецъ, «ил» Сынъ, «уіа» Духъ святый, сирѣчь, слава Отцу, слава Сыну, слава Духу святому. И по Григо-рію Нисскому: «алл» слава, »ил» Богу, «уіа» живому. И по Кириллу Александрійскому: «алл» державный, «ил» Бог, «уіа» той единъ, или: хвалите истинна Господа и похвалите его достойно. И по Симмаху и по иныхъ толковникѣх: «алл» приiде, «ил» явися, «уіа» Бог, или пѣснь Божiа: хвалите Господа яко благъ, псаломъ. Сiя толкованiя обрѣтаются въ древнихъ книгахъ о аллилуiа; а никто отъ святыхъ и мудрыхъ толкова сiю на единъ разумъ. Обаче три чины обрѣтаются во святѣй церкве, по преданію святыхъ Отцевъ, о аллилуіи первое убо во учиненыхъ мѣстѣхъ глаголати аллилуіа 3-жды, «слава тебѣ Боже»; второе во иныхъ учиненыхъ мѣстѣхъ и временѣхъ аллилуіа токмо трижды, кромѣ «слава тебѣ Боже»; третіе же во иныхъ учиненныхъ стихахъ единожды аллилуіа глаголати, или пѣти. И разумъ есть въ томъ сицевъ: егда глаголемъ 3-жды аллилуіа кромѣ, «слава тебѣ Боже,» или единожды, тогда являете «слава тебѣ,» или токмо слава или хвала; аще же есть стихъ къ лицу Божiю, тогда разумѣется и за «слава тебѣ Боже», а егда будетъ, стихъ къ лицу Богородицы, или святаго коего, тогда знаменуетъ «слава тебѣ Богородице», или «слава тебѣ святый Божій», или хвала; якоже и въ литійныхъ стихирахъ святаго великомученика Георгія писано есть: «аллилуіа, аллилуіа, аллилуіа Христу воскресшему,» тамо разумѣется сице: слава, слава, слава, или хвала, хвала, хвала Христу воскресшему. Такожде и индѣ сице православно разумѣетъ святая Восточная, церковь во аллилуіа разнымъ разумомъ, по сличію стиха и времене; зане сія аллилуіа Ангельская пѣснь есть, и сего ради разное и многое толкованіе въ себѣ имѣетъ, якоже прежде рекохомъ яснѣйше.
Въ Евфросиновѣ Житіи писано отъ соннаго мечтанія велія и несказанная хула на святую и живоначалную Троицу, еяже и писанію предати не подобаетъ; толкуй бо аллилуіа глаголетъ воплотившася Бога Отца, и покаи глаголетъ воплотившася святаго Духа, и паки воскресша Бога Отца и святаго Духа. Паки бо той же списатель глаголетъ о трегубой аллилуiи, яко вся церкви по всей земли законно глаголаша издревле трижды аллилуiа: и паки ниже тамо же глаголетъ: издревле трижды аллилуiа; и паки ниже тамо же глаголетъ: издревде взяся троити святая аллилуіа; и паки той же списатель повѣдуетъ, яко глаголющiи трижды аллилуіа, въ четвертое «слава тебѣ Боже», просіяша мнози въ чюдѣсехъ; сице не согласуется самъ себѣ той списатель. Прилѣжно же прочитаяй Жiтие святаго Евфросина уразумѣетъ вся сія и болша сихъ.
Черновой подлинникъ писанъ въ листъ, на девяти листахъ.
XI. Благодать Господа Бога и Спаса нашего Іисуса Христа посѣтивши святую свою Ве-ликороссійскую церковь, въ совокупленіе же собирающи, соединеніемъ и согласіемъ пре-святаго и животворящаго Духа, сошедшійся нынѣ святый соборъ въ царствующемъ велицѣмъ столнѣмъ градѣ Москвѣ, повелѣніемъ великаго государя царя и великаго князя Алексія Михайловича, всеа Великія и Малыя и Бѣлыя Росіи самодержца, съ присутствующими святыя православныя Восточныя церкве святѣйшими патріархи, великимъ господиномъ папою и патріархомъ и судіею вселенскимъ великого града Александріи и всего полудне кѵръ Паисіемъ, и великимъ господиномъ патріархомъ великаго Божія града Антіохіи и всего востока кѵръ Макаріемъ, призванными (Въ подл. противъ этого слова сдѣланъ варіантъ: пришедшими.) по изволенію и тщанію его великого государя на сій святый соборъ, вящшаго ради увѣренія ко исправленію чина церковнаго, вкупѣ по благословенію великого господина святѣйшаго ІоасаФа патріарха Московского и всеа Росіи, со, всѣми (Въ подл. было сначала: совѣтомъ, потомъ поправлено со всѣми.) архіереи Великороссiйскiя церкве, съ митрополиты, и со архiепископы, и епископы, и со всѣмъ освященнымъ соборомъ, утверждающе и соединяющи (И соединяющи прибавлено другимъ почеркомъ.) во единство и согласіе вѣры и чина Великороссійскую церковь со святою Восточною церковію въ нѣкихъ древнихъ преданіяхъ святыхъ Апостолъ и святыхъ Отецъ: въ нихъже и яже на бывшемъ соборѣ въ царство царя Іоанна Васильевича всеа Россіи на нѣкія вины погрѣшенныя, о аллилуіа, и еже кіими персты изображати на лицѣ своемъ всякому православному крестное изображеніе, подобнѣ и о священническомъ кіими персты изображати и осѣняти православныхъ, и о четверочастнѣмъ (Въ подл. поставленъ варіантъ: о четвероконечномъ.) крестѣ, и о молитвѣ соборнѣй яже есть: «Господи Іисусе Христе Боже нашь, помилуй насъ,» и о прочихъ несогласіяхъ бывшихъ въ преждепечатныхъ книгахъ въ реченіахъ и чинѣхъ; яже вся нынѣ на семъ соборѣ, по даннѣй благодати отъ святаго Духа, исправлена быша со всякимъ извѣщеніемъ святѣйшими святыя Восточныя церкве патріархи, со всѣмъ освященнымъ соборомъ Великороссійскія церкве. На похваляющыя же и утверждающыя преждебывшая на соборѣ ономъ бывшемъ о аллилуіи, и о сложеніи перстовъ во крестѣ, и въ прежепечатныхъ книгахъ въ чинѣхъ или въ реченіяхъ, якоже въ Символѣ и прочихъ несогласныхъ сущихъ со древними рукописными Словенскими и со Греческими книгами пріемлющія, и той бывшій соборъ при царѣ Іоаннѣ Васильевичѣ и при митрополитѣ Макаріи во свидѣтельство себѣ о аллилуіи и о сложеніи перстовъ приводящыя, отвѣтъ соборный сицевъ: Многія образы и указанія имать святая церковь отъ Ветхаго и Новаго завѣта на лутшее преспѣвати ей, аще соборнѣ и обще, аще отчасти, сіе же бываетъ отъ еже не ратерзаватися намъ другъ отъ друга; но повиноватися и ко общей ползѣ совѣтъ благій другъ отъ друга любопріятно воспріимати. Якоже премудрый Соломонъ глаголетъ (Противъ этихъ словъ па полѣ означено: Притч. 11.): имъже нѣсть совѣта падутъ яко листвія, спасеніе же во мнозѣ совѣтѣ есть. И Петръ Апостолъ (Тамъ же: Петр. 1, глав. 5.): вси убо другъ другу повинующеся, стяжите смиреномудріе.
И въ первомъ убо Завѣтѣ (Тамъ же: Исход. 18.) образъ сему Моисей бѣ, иже тестя своего Іофора послушавый совѣта нѣчто полезному отъ него навыче, еже той не свѣдяше. Въ Новомъ же и многая нѣчто обрѣлъ бы свидѣтельства отъ самѣхъ Апостолъ: неточію отъ меншихъ, но и отъ верховнійшихъ другъ другу повиновахуся, яко внегда Павелъ уступи и повинуся Петру и Іякову во Іерусалимѣ, да еще по смотрѣнію [не бо вещь нуждна] (Тамъ же: Дѣян. 15. 21), множае бы паче за истину повинулся; но и Петръ во Антіохіи Павлу повинуся, внегда зазрѣ ему съ языки ядущему. Подобнѣ сему и послѣди святыхъ Апостолъ святіи Отцы, иже на соборѣхъ вселенскихъ и на помѣстныхъ бывшіи, узаконоположенная отъ преждебывшихъ соборовъ прочіи послѣди ихъ обличаху, и исправляху несовершеннѣ изложенная отъ нихъ правила; и яже въ чесомъ отъ преждебывшихъ неисправленная, послѣди же бывшими исправлена, на среду во увѣреніе вкратцѣ здѣ да предложатся: Первое свидѣтельствуетъ сему въ Новой Кесаріи соборъ святыхъ Отецъ, въ немъже правило 15 по 7-ми дiяконовъ имѣти завѣща, аще и велIй градъ есть; святiи же Отцы Шестаго вселенского собора зазрѣша о семъ Неокесарiйскому собору, яко недобрѣ неразумѣша еже въ книгахъ Дѣянiихъ Апостольскихъ о 7 діаконъ лежащего словесе не о служащихъ бо тогда Божественным Тайнамъ мужехъ бяще попеченіе апостоломъ, но о служащихъ въ трапезахъ, имъже бѣ поручено строеніе общіе потребы; тогда собравшеся и имѣти коейждо церкви узакониша, противу имѣнію сходящемуся къ ней. Подобнѣ сему Шестый же вселенскій соборъ Карфагенского собора узаконополженіе [еже тамо заповѣдуетъ по вечеряніи святымъ Тайнамъ Христовымъ причащатися, по подобію Господню оноя вечери], разрѣши и исправи, не ядшимъ повелѣ святителемъ въ той день безсквервую службу совершати, и людемъ такоже не ядшимъ тоя причащатися. Неточію же cie, но и Апостольская узаконенія и правила святіи Отцы послѣди на соборѣхъ исправляху на лутчее; якоже видѣти есть въ 6-мъ же Вселенскомъ соборѣ, во 12 правилѣ сице глаголано: аще и речено есть во Апостольскихъ правилѣхъ не пустити женъ епископомъ, но мы на лутшее поспѣшеніе промышляюще, поставляемому епископу уже кътому не жити съ женою заповѣдуемъ. И многа ина такова обрѣсти имать, кто въ правилѣхъ святыхъ Отецъ отъ прежнихъ убо святыхъ соборовъ недобрѣ нѣкая, забвенія ради или иного дѣльма случая, изложенная отъ послѣднихъ соборовъ безъ всякого зазора обличена и добрѣ исправлена быша; и святая церковь не стужаетъ о семъ, паче же похваляетъ. Тѣмъже убо посему да никто же и нынѣ стужаетъ о семъ настоящемъ соборѣ, видя нѣкія вины, на ономъ бывшемъ соборѣ при царѣ Іоаннѣ Васильевичѣ погрѣшенныя, о крестѣ, и о трегубой аллилуіи, и о согбеніи перстовъ, и о Сѵмволѣ, и о прочихъ вещахъ писаныхъ на ономъ соборѣ, или въ прочихъ книгахъ печатныхъ или писменыхъ неписаныя, исправляемы нынѣ же, повелѣніемъ великого государя царя и великого князя Алексѣя Михаиловича, всеа Великія и Малыя, и Бѣлыя Россіи самодержца, отъ великого сего собора святѣйшими вселенскими патріархи, со многимъ свидѣтельствомъ и съ великимъ («и съ великимъ» поправлено въ подл. вмѣсто: и всякимъ.) тщаніемъ исправленыя совершенно, но съ зѣлнымъ же паче прилежаніемъ да пріемлетъ я и чествуетъ и да любитъ [нынѣ] исправленое cie соборное и обдержное отъ всѣхъ сущихъ православныхъ по всей вселенной обрѣтающихся, и да повинуется по писанному отъ Апостола Павла, глаголюща: дуси пророчестіи пророкомъ да повинуются; купно зря и на предреченныя (Въ подл. ошибк. и на предченныя.) здѣ вины отъ насъ вышеписанные, како соборъ собора исправляше и церковь святая нетокмо cie пріимаше, но и въ будущее время образъ сему подаваше свидѣтельствовати и исправляти намъ другъ друга, лучшаго ради пріобрѣтенія еже къ ползѣ; бывшій же здѣ соборъ оный во свидѣтельство да не пріемлетъ, понеже не свидѣтельствованъ есть, ниже бо писаніемъ ко вселенскому патріарху и ко прочимъ святыя Восточныя церкве о церковныхъ винахъ возвѣщенный, якоже обычай имать святая церковь, по преданію святыхъ Апостолъ и святыхъ Отецъ, о всякихъ церковныхъ вещахъ совопрошатися, ниже мѣстоблюстителей отъ оныхъ бысть кто, якоже въ правилахъ о семъ писаное видѣти есть.
Но речетъ кто любопріятельнѣ, яко соборъ иже бѣ здѣ въ Россіи совершенъ и равенъ все-ленскимъ, понеже и царь бѣ на немъ, яко и на прежнихъ селенскихъ соборехъ? Отвѣтуемъ. Ни не бо всяко пріятенъ, поне аще бы и помѣстный былъ, и нитако бы простѣ пріятенъ былъ безъ свидѣтельства. Чесо же ради? Понеже тогда у онѣхъ на соборѣхъ многое собраніе бяше святыхъ, и ови отъ нихъ содѣянное на соборѣхъ соглашенія ради и свидѣтельства писаху и посылаху въ высшія себе во иные многія области, овыя же имѣли и мѣстоблюстители верховныхъ архіереовъ, а безъ верховныхъ вселенскихъ архіереовъ совѣта помѣстніи же и сами верховніи ничтоже смѣяху творити о себѣ; якоже свидѣтельствуетъ второе правило Карѳагенскаго собора, [сице глаголя: понеже обрѣтошася въ Никіи содѣянная написана, достоитъ Римскому, Константина града и ко Александрискому писати, оттуду сія пріяти и намъ показати]. Аще ли кто отнынѣ начнетъ прекословити о изложенныхъ винахъ на соборѣ семъ великомъ отъ святѣйшихъ вселенскихъ патріархъ, яже исправиша и узаконоположиша о аллилуіи, и о крестѣ, и о прочихъ винахъ, яже писаны суть въ соборномъ изложеніи настоящаго сего собора, въ лѣто отъ Божія по плоти Рожденія 1667, и въ книзѣ Правленія Жезла: да будетъ, по апостолу Павлу, въ правду самоосужденъ и наслѣдникъ клятвѣ сего собора, писаннѣй въ соборномъ дѣяніи его, яко преслушникъ Божій и святыхъ Отецъ правиломъ противникъ.
Подлинникъ (черновой) писанъ въ листъ, на шести листахъ. Здѣсь же находится современное заглавіе акта, писанное киноварью:
Увѣщеніе о бывшемъ соборѣ въ лѣто 7059, въ царство царя Іоанна Васильевича всеа Россіи.