Деяния Поместного Собора 1660г.
1660 г., после Марта. Перевод с греческаго письма о том, что не следует в России руководствоваться существующим в Восточной церкви обыкновением давать в управление лишившимся от гонения Турок престолов патриарших низшия епархии, с правом присутствования на соборах
Печатается по изданию: Дело о патриархе Никоне… С. 87 и далее
Благочестивейший и самодержче, великий царю и святый свещенный собор! Суть нецы или дружбою носими прежнего патриарха господина Никона, или не разумеюще добре разумеваемо правил, скорбятся о извержении ево, сиречь, еже по времени упражнения священства его, еже свещенный собор, якоже священии закони и правила повелевают, согласующе вси изрекоша быти, дондеже той господин Никон смирится и паки взыщет со умолением от нового рукополагаемого патриарха и свещенного собора священства, якоже и при святом и вселенском третием соборе сотвори Евстафий, Панфилийский епископ; обаче сицевий не розумевающе добре священных правил непшевают, яко несть праведно извергнути его и упразднити его от священства и распрю творяще, утвержают и показуют образ патриархи Константинопольския; яко и суще вне престол своих имут священство и священнодействуют и рукополагают, и глаголют сицевая, зане не ведают добре вин и чесо ради сице надержится и бывает ныне в том святейшем престоле Костентинополском; да слышат же добре распрю творяще и да навыкнут, яко не пребеззаконно свещенство имут, суще вне престола своего, но ниже по законом и правилом, обаче смотрение употребивше, пребезаконно бо отметаются и отгоняются престола своего от нечестивых агарянов, а не волею оставляют престоли и епархии, ниже от неких оглаголеми, ниже от собора судими и извержени священнодействуют, но кроме оглаголания некоего и кроме суда соборнаго и кроме извержения и кроме оставления волного, но нуждею и насилством нечестивии изгоняют, или и пенезей ради многих, яже Турцы от них просят, и не имуще дати, боящеися нужды и насилства их, отступают от того великого престола; и сего ради со разсуждением паки потом, егда умирятся вещи, упокоит их собор смотрительно управления ради церкви Христовы, зане Турцы Бога и веру и закон пенези имут и навыкоша сицевым образом взяти пенези часто от патриаршества и от прочих архиереов, и егда желают пенези или скипетры держать, или первый их князь, глаголемый везирь, или ине хто от великих паш первие глаголют ему, яко сотвори некое погрешение и извещают ему, яко сице слышано о тебе, и аще убо пошлет толико пенезей десять или пятнадесять тысещ златых, имамы умирити вещь; аще же велико зло приидет на тебе слышай сие патриарх Костентинопольский что имать творити; ино разве аще случатся пенези послет я с достойными человеки заградити усты врагов веры; аще же не случится пенези, что ино может творити разве дати место гневу? и тако втай утаится и бежит, аможе может.
Таже Турцы видеша, яко не получиша желания своего, гневающеся зело на избежавшаго патриарха, именуют его врага царства, и тако повелевают собору архиерейску, случающуся по времени оному в Констянтинополии, и князем и клириком великия церкве со прещенми и гроженми великими, яко да поставят вскоре иного патриарха, и сие не творят Турцы, яко имут попечение о патриаршестве, но сущу обычаю ветхому, яко егда сядет новый патриарх, дати царю почесть толико тысещ златых и везирю подобно толико тысещ, и иному паши великому толико, и всякому паши по толику, якоже имут и учинено и обычей, и сего ради повелевают с нуждею и насилством, да поставят вскоро иного патриарха, помышляюще: аще от перваго патриарха не получиша и не взяша пенези, поне от нового возмут учиненное. И что ино имать творити собор и клирицы и князи токмо аще есть возможно укротити вину пенезми по силе своей, да изходит яве первый патриарх и да будет паки на престоле своем уже добре; аще ж и видят, яко гнев Турков есть великий, да не явятся сопротивнии царству и погибнет совершенно великая церковь Христова покоряющеся и царствию и управляющей церковь Христову, избирают от случающихся в настоящее архиереов единого избраннаго и возводят его на патриаршеский престол, и даются учиненные почести царствию и прочим пашам. Тако мирствует гнев их. Таж егда престанет господин их, исходит яве прежний утаенный патриарх и беглец и призывает собор архиереов и князей и клириков, глаголя: святый священный соборе, сами добре весте, яко аз отрицания престола своего не сотворих, ниже волею отступих, ниже архиерейство ваше изверже мене, но нужда и насильство держащих нас понуди и мене и отступих от престола и архиерейство ваше понуди, и возведосте иного на престол мой ныне, понеже благодатию Христовою укротися гнев их; сотворите, якоже возлюбленнии братия и сослужителие, суд и разсуждение: или престол мой паки дадите мне, или упокойте мя иным престолом, да живопитаюся.
И тако собор и новый патриарх согласуеми вси упокоевают его и дают ему един престол, о котором согласят имети им и обладати и священнодействовати и рукополагати и совершати вся архиерейства, и именоватися прежнему патриарху Костентинополскому и председателю оныя сице митрополии сиречь оныя, юже дают ему, якож дааша и митрополию Броилавскую блаженные памяти прежнему патриарху господину Афонасию Пателару, и якож даша и Ефес господину Паисию, прежнему патриарху, и Паронаксию и Фермию господину Ианикию, и тому прежнему патриарху, и священнодействуют и освящают и совершают вся архиерейская, наипаче господин Паисий идет часто в Костянтин град и сходится с настоящим патриархом, и многажды суда смотриша вкупе и судиша и служиша вкупе многажды; обаче сия яже бывают ныне в Констянтине граде не бывают по законом и правилом, но ниже пребеззаконно, и кроме правил творят от себе сия; но и сия сице творят ныне правляюще Христову святую и великую церковь в сем злополучном времени укротяюще и паке кроме слова гнев держащих нас нечестивых, зане аще не сотворяху сицевое управление возгорился бы вящи гнев нечестивых на церковь Христову; якоже вси ведают, что случися в прошло время господину Парфению патриарху и прият сицевую неправедну и безчестну смерть; кая ина бе вина, токмо просяще от него паши пенези и той не имеяй дати, и паки, ведая себе неповинна, не отступи.
И тако видеша наши, яко стоит неуклонно на престоле своем, оклеветаша на него возносяще, поведающе держащему скипетры, яко есть враг царствию его и яко писании своими воставляет брани и воинства, призываяй християнов на Турки, и конец повесиша его и бысть мученик истиннейший. Сицевым образом стражут в странах наших архиерее часто, тако претерпевают мучения и оклеветания, и аще оставят и престоли своя, от таковых нужды и от таковых мучений, отставят их, и сего ради законно и праведно имут и священство, идеже аще обрящутся и служат и рукополагают и вся архиерейства совершают, имуще паки и благословение и волю от собора и от патриарха. Сия бо и образ сицевый сущу благочестивому царю и християнству неприличны суть, ниже да будут, ниже да внимаются, ниже да слышатся; зане благодатно всесилнаго Бога, елико выше поведахом, в странах сих християнского царствия ниже бяху, ниже суть, ниже когда быти Бог сохранит; и сущу зде благочестно и християнству несть лепо внимати, и яже яко от нужды управляются в странах наших нынешнего времени, зане они добре ведают священныя законы и правила, но время не помогает им во всех; обаче зде, благодатию Божиею, время помогает смотрити священная правила что повелевают; и тако по законам и правилом да будет и да совершится и обычай да надержится, якоже правила повелевают; о отрицании же и извержении и упражнении священства, якоже рехом, и паки глаголем, образ чист есть в том во священных правилах Евстафий, Панфилийский епископ, и иже при святем и вселенском великом третием соборе, иже имал разум и ум здрав во главе своей да смотрит и узрит яснее, како обдержит послание святаго и вселенского третияго собора к сущим в Памфилии, яко по отрицании, еще сотвори Евстафий, пребысть и извержен, якож является, не от себе извержеся, но от собора извержеся и возбранися священства. Зане аще не бе извержен от собора и возбранен не совершити священства, и не токмо священства не совершити, но ниже имя епископа имети, аще не бе сице, не бе нужда и потреба притекати и припасти ко святому и вселенскому третиему собору, просити со многими слезами и многим умолением имене и чести епископа; и умолени бывше, пишет, слезами его и многою старостию и смирением его благоувевшеся, дася ему имя и честь епископа имети, но не священнодействовати и рукополагати егда сам хощет, но егда от брата и сослужителя, иже по месту архиерея призовется и повелен.
Неправелне же сия решася святыми, но смотрише и снисхождение употребивше, кий грех или кое ино погрешение, рцыте нам, о мудрейший, сотвори той Евстафий, и извержеся и управися, сице. Яве есть, яко не за иное погршение, токмо яко отречеся престола своего, и когда и в кое время отречеся престола своего, и кто изверже его, и хто паки с прощением управи его, явлено известно есть, яко святый и великий вселенский третий собор; хощете еще ин больший собор от того? Хощете правило большее и известнейшее от того? И образ чистший того же Евстафия и суд и разсуждение известнейшее от святаго и вселенскаго третияго собора. Который ин святейший и мудрейший обрящется от тех святых отец того же святаго собора, творити лучший и мудрейший суд и разсуждение? Сего ради возбудитеся, братие, молю вас, еликих в сем смущаются ум ваш и внемлите, яко и ныне собравшийся содействием Святаго Духа священный собор не иным образом судиша и изреша, но неизменно по тому ж образу и суду и разсуждению святаго и вселенскаго третияго собора, согласуеми вси судиша и изреша, яко неизменно в сем быти, якож и при Евстафии быша. Хощете, братие и друзи, показати помощь и дружбу и не добре мыслите мыслимая правилов, обаче престанете распри и оглаголания, и да имамы прощение
(На обороте письма помета дьяка: 168. По склейкам: 168 Диак Александр Дуров).